يرانمەن يادرولىق كەلىسىمگە كەلۋ مۇمكىندىگىنە بايلانىستى مۇناي باعاسى تومەندەدى
تەگەران ەكسپورتتى ۇلعايتۋى مۇمكىن، دەپ حابارلايدى قازاقپارات ءتىلشىسى Reuters اقپارات اگەنتتىگىنە سىلتەمە جاساپ.
كەشە ەۋروپالىق وداق 2015-جىلعى يران يادرولىق كەلىسىمىن قالپىنا كەلتىرۋ تۋرالى شەشىم جوباسىنىڭ سوڭعى ءماتىنىن ۇسىندى. ەۋرووداق جوعارى لاۋازىمدى شەنەۋنىگىنىڭ ايتۋىنشا، تۇپكىلىكتى شەشىم قابىلدانۋى ءۇشىن ا ق ش پەن يراننىڭ ماقۇلداۋى قاجەت. بۇل ماسەلە «بىرنەشە اپتانىڭ ىشىندە» اياقتالۋى مۇمكىن.
وسى رەتتە Brent ماركالى مۇناي بۇگىن 1,34 دوللارعا نەمەسە %1,4 عا ارزانداپ، باررەلى 95,31 دوللارعا باعالاندى. ال، ا ق ش- تىڭ West Texas Intermediate WTI ماركالى مۇنايى 1,25 دوللارعا نەمەسە %1,4 عا ارزاندادى، ونىڭ باررەلى 89,51 دوللار تۇرادى.
رەسمي تۇردە بىرلەسكەن جان-جاقتى ارەكەت جوسپارى (JCPOA) دەپ اتالاتىن يراننىڭ يادرولىق كەلىسىمىن قالپىنا كەلتىرۋ تۋرالى كەلىسسوزدەر بەس ايلىق ۇزىلىستەن كەيىن وتكەن اپتادا ۆەنادا قايتا جالعاستى.
ال، 5- تامىزدا Brent ماركالى مۇناي 92,78 دوللارعا دەيىن قۇلدىرادى، بۇل - وسى جىلعى اقپاننان بەرگى ەڭ تومەنگى باعا. بۇعان انگليا بانكىنىڭ ءتورتىنشى توقساندا ۇلى بريتانيا ەكونوميكاسى 15 ايعا سوزىلاتىن رەتسەسسياعا ەنەتىنىن ەسكەرتۋى سەبەپ بولدى.
باعانىڭ تومەندەۋىنىڭ تاعى ءبىر بەلگىسى - قىتايعا شيكى مۇناي يمپورتىنىڭ ازايۋى بولدى، كەدەن مالىمەتتەرىنە سايكەس، بۇل كورسەتكىش شىلدەدە وتكەن جىلمەن سالىستىرعاندا %9,5 تومەندەگەن.
نارىق ا ق ش- تىڭ مۇناي جەتكىزۋ تۋرالى اپتا سايىنعى ەسەبىنىڭ سوڭعى راۋندىن كۇتىپ وتىر. ەڭ الدىمەن، امەريكا مۇناي ينستيتۋتىنىڭ ەسەبى نۇر-سۇلتان ۋاقىتىمەن ەرتەڭ ساعات 2:30 دا شىعادى.
