ەلىمىزدە تۋىس ەمەس دونورلارعا سۇرانىس كوپ
دونور تابىلسا، پالاتالار جەتىسپەي جاتادى، دەيدى دارىگەرلەر. قازىردىڭ وزىندە 30 ادام ترانسپلانتاتسيا كەزەگىن كۇتىپ وتىر. مارات قارتپايەۆ اتىراۋداعى مۇناي كەن ورنىندا ەڭبەك ەتەدى. التى بالانىڭ اكەسى بىلتىر قان اۋرۋىنا شالدىققان. دياگنوزى انىقتالا سالا، ەلورداداعى ۇلتتىق ونكولوگيالىق عىلىمي ورتالىعىنا جىبەرىلەدى. ناۋقاستىڭ باعى بار ەكەن. تۇڭعىشى دونور اتانىپ، اكەسىنىڭ وڭالۋىنا سەبەپكەر بولدى.
مارات قارتپايەۆ، ناۋقاس:
- وسىندا ەم الىپ جاتىرمىن. جەلتوقسانعا دەيىن 4 كۋرس الدىم، حيميوتەراپياسى بار. دەمالىپ كەلدىم دە، سودان كەيىن ترانسپلانتاتسياعا كەلدىم وسىندا. ترانسپلانتاتسيا ءوزىمنىڭ ۇلكەن قىزىم بولدى. جاقسى قازىر. اللاعا شۇكىر. قانىمدى اۋىستىرىپ شىقتىم.
ەلدە تۋىستىق ەمەس ترانسپلانتاتسيا دا ءساتتى جاسالىپ جاتىر. الايدا دونور تاپشى. ماسەلەنى شەشۋ ءۇشىن قازاقستان- رەسەي تىركەلىمى تۇزىلگەن. وندا دا ىنتالىلار كوپ بولماي شىقتى.
ايزات سۇلەيمەنوۆا، ۇ ع و و №2 ونكوگەماتولوگيا بولىمشەسىنىڭ مەڭگەرۋشىسى:
- قازاقستاندىق- رەسەيلىك رەگيستردە دونور مۇلدە بولماسا، وندا ءارى قاراي دج رەگيستردەن دونور ىزدەيمىز. ەگەر دە دج رەگيستردە ناۋقاسقا سايكەس كەلەتىن دونور انىقتالسا، وندا ول ناۋقاس بيۋدجەت ارقىلى شەتەلگە ترانسپلانتاتسياعا باعىتتالادى. ونىڭ ترانسپلانتاتسياسى شەتەلدە دە ناۋقاس ءۇشىن تەگىن بولادى. ول مەملەكەت تاراپىنان بولادى.
قازىر سۇيەك كەمىگى ترانسپلانتاتسياسىنا ۇلتتىق عىلىمي ونكولوگيالىق ورتالىعىندا 30 ناۋقاس كەزەگىن كۇتۋدە. الايدا ەلدەگى تىركەلىمدە بار- جوعى 9000 دونور تىركەلگەن. سايكەس كەمىكتى تابۋ وڭاي ەمەسىن ەسكەرسەك، ونىڭ 1-2-ەۋى عانا دونور بولۋعا جاراۋى مۇمكىن.
دۋلات يماشپايەۆ، ترانسفۋزيولوگيا ع ءو و باسقارما ءتوراعاسىنىڭ ءبىرىنشى ورىنباسارى:
- ەۋروپا مەملەكەتتەرىندە، ا ق ش- تا دونور تىركەلىمىنە كوبىرەك اقشا بولىنەدى. قور بار، سول سەبەپتى تىركەلىم سانى ۇلعايعان. تىركەلىم دۇرىس جۇمىس ىستەۋ ءۇشىن حالىقتىڭ ءبىر پروتسەنتى تىركەلىمدە بولۋى كەرەك. ءبىزدىڭ مەملەكەتكە كەلەتىن بولساق، 100 مىڭ، 180 مىڭ ادام ەگەر تىركەلىمدە بولاتىن بولسا، د ج ستاندارتتار بويىنشا ەڭ مىقتى كورسەتكىشتەردىڭ ءبىرى بولىپ تابىلادى.
ۇلتتىق ونكولوگيالىق عىلىمي ورتالىعىندا 2010 -جىلدان بەرى سۇيەك كەمىگىن اۋىستىرۋدىڭ بارلىق ءتۇرى تەگىن جاسالادى. الايدا پالاتالاردىڭ ازدىعى ناۋقاستاردى تۇگەل قامتۋعا كەدەرگى. قازىر ورتالىقتىڭ جاڭا عيماراتى سالىنىپ جاتىر. وندا 15 ەمدەلۋ بولمەسى اشىلماق. بۇل دا از بولۋى مۇمكىن. ويتكەنى ماماندار دۇنيەجۇزىلىك تىركەلىمنەن دونور قابىلداپ، ترانسپلانتاتسيانى ەلدە جاساۋعا نيەت ەتىپ وتىر. ءبىراق ول ءۇشىن ترانسپلانتاتتى تاسىمالداۋ بارىسى ۇكىمەتپەن رەتتەلۋى كەرەك.
ايزات سۇلەيمەنوۆا، ۇ ع و و №2 ونكوگەماتولوگيا بولىمشەسىنىڭ مەڭگەرۋشىسى:
مىسالى، جاپونيادا، ا ق ش- دا جىلىنا 500-600 ترانسپلانتاتسيا جاسالادى. شىعىس ەۋروپادا جىلىنا 180-200-گە تاياۋ ترانسپلانتاتسيا جاسالادى. ءبىزدىڭ ەلدە جىلىنا 70-75 ترانسپلانتاتسيا جاسالادى. ترانسپلانتاتسيانىڭ بۇنداي شەكتەۋلى سانى ول ترانسپلانتاتسيالىق بولىمشەدەگى پالاتالاردىڭ ازدىعىنا بايلانىستى. ول جەردە تەك 6 عانا پالاتا بار. ەگەر دە پالاتالاردىڭ سانى 2 ەسە نەمەسە 3 ەسە كوبەيسە، وندا بىزدەر جىلىنا شامامەن 180-200 گە تاياۋ ترانسپلانتاتسيا جاساي الامىز.
دونوردىڭ سۇيەك كەمىگى 6 ايدان كەيىن قالپىنا كەلەدى. وسى رەتتە ماماندار اقىلى ترانسپلانتاتسياعا ءۇمىت ارتىپ، شەكارا اسۋدىڭ قاجەتى جوق دەيدى. ويتكەنى ناۋقاس ءبىر جىل كولەمىندە دارىگەرلەردىڭ باقىلاۋىندا بولۋى قاجەت. وڭالتۋ قىزمەتى دە ەلدە تەگىن كورسەتىلەدى.
www.24.kz
