جەتىسۋ وبلىسىنىڭ كوكسۋ جانە ەسكەلدى اۋداندارىنا جاڭا اكىمدەر كەلدى

تالدىقورعان. قازاقپارات - جەتىسۋ وبلىسى اكىمىنىڭ وكىمىمەن كوكسۋ جانە ەسكەلدى اۋداندارىنا جاڭا اكىمدەر تاعايىندالدى، دەپ حابارلايدى قازاقپارات.

ءوڭىر اكىمدىگىنىڭ مالىمەتىنە سايكەس، كوكسۋ اۋدانىنا اكىم بولىپ مارلەن كولبايەۆ كەلدى. مارلەن قاپاش ۇلى 1976 -جىلى تۋعان، ءبىلىمى جوعارى. «جەتىسۋ» ينستيتۋتىن «ەكونوميكا جانە مەنەدجمەنت»، ءو. ا. جولداسبەكوۆ اتىنداعى ەكونوميكا جانە قۇقىق اكادەمياسىن «زاڭ» ماماندىقتارى بويىنشا ءبىتىردى. ەڭبەك جولىن ىشكى ىستەر باسقارماسى كۇزەت ءبولىمىنىڭ پوليتسيا قىزمەتكەرى بولىپ باستاعان. ءبىرشاما جىل «جەتىسۋ» ەكونوميكالىق ينستيتۋتىندا ءتۇرلى قىزمەتتەر اتقاردى. كەيىن تالدىقورعان قالاسىنىڭ كاسىپكەرلىك ءبولىمىنىڭ باستىعى، تالدىقورعان قالاسى اكىمىنىڭ ورىنباسارى، «جەتىسۋ» ا ك ك» ۇ ك» ا ق اگروونەركاسىپ كەشەنى دەپارتامەنتىنىڭ باس مەنەدجەرى، تالدىقورعان قالالىق ادامي رەسۋرستاردى باسقارۋ دەپارتامەنتىنىڭ جوبالاردى باسقارۋدىڭ باس مەنەدجەرى، «جەتىسۋاگروساۋدا» ج ش س- نىڭ تالدىقورعان ايماعى بويىنشا باستىعى، تالدىقورعان قالاسى اكىمى اپپاراتىنىڭ باسشىسى، قالا اكىمىنىڭ ورىنباسارى بولدى.

2018 -جىلدىڭ جەلتوقسانىنان - الماتى وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى. ال كوكسۋ اۋدانىنىڭ اكىمى بولعان الماس قابدۋل ۇلى ءادىل باسقا جۇمىسقا اۋىسۋىنا بايلانىستى قىزمەتىنەن بوساتىلدى.

ەسكەلدى اۋدانىنىڭ اكىمى لاۋازىمىنا احمەتوۆ ەلدوس تۇرسىنباي ۇلى بولىپ تاعايىندالدى. ەلدوس تۇرسىنباي ۇلى1968 -جىلى تۋعان، ءبىلىمى جوعارى. سەمەي قارجى- ەكونوميكالىق تەحنيكۋمىن «مەملەكەتتىك بيۋدجەت»، قازاق مەملەكەتتىك ەكونوميكالىق ۋنيۆەرسيتەتىن «قارجى جانە نەسيە»، ءال- فارابي اتىنداعى قازاق ۇلتتىق ۋنيۆەرسيتەتىن «زاڭ» ماماندىقتارى بويىنشا بىتىرگەن.

ەڭبەك جولىن تالعار قالاسى بويىنشا سالىق ينسپەكتسياسىنىڭ سالىق ينسپەكتورى بولىپ باستادى. ءار جىلداردا تالدىقورعان وبلىسى بويىنشا سالىق ينسپەكتسياسىنىڭ سالىق ينسپەكتورى، اعا سالىق ينسپەكتورى، باس سالىق ينسپەكتورى، تالدىقورعان وبلىسىنىڭ تالدىقورعان اۋدانى بويىنشا سالىق ينسپەكتسياسىنىڭ، سالىق ءبولىمىنىڭ، سالىق كوميتەتىنىڭ باستىعى، الماتى وبلىسى ەسكەلدى اۋدانى بويىنشا سالىق كوميتەتىنىڭ باستىعى، ءتوراعاسى، كوكسۋ اۋدانى بويىنشا سالىق كوميتەتىنىڭ ءتوراعاسى، ءبولىم باستىعى، تەكەلى قالالىق قارجى ءبولىمىنىڭ باسشىسى لاۋازىمدارىن اتقاردى. 2018 -جىلدىڭ اقپانىنان ەسكەلدى اۋدانى اكىمىنىڭ ورىنباسارى بولدى.