مينيستر باسپانا سالۋ جوسپارىنىڭ نە ءۇشىن ورىندالماعانىن ءتۇسىندىردى

نۇر-سۇلتان. قازاقپارات - يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسىنىڭ نەلىكتەن تولىق ورىندالماعانىن ءتۇسىندىردى، دەپ حابارلايدى قازاقپارات ءتىلشىسى.

«2021 -جىلدىڭ قورىتىندىسى بويىنشا 3 كورسەتكىشكە قول جەتكىزىلگەن جوق. ءبىرىنشى، 163,1 مىڭ تۇرعىن ءۇيدى پايدالانۋعا بەرۋ كورسەتكىشى ورىندالمادى، بۇل ءبىر باسپانا ءۇشىن بازالىق اۋداننىڭ ايىرماشىلىعىنا بايلانىستى. ماسەلەن، ستاتيستيكا دەرەكتەرى بويىنشا حالىق جوسپارلاعان 6,8 ميلليون شارشى مەتردەن 7 ميلليون شارشى مەتر تۇرعىن ءۇي سالىندى. ياعني، ينديكاتيۆتى ەسەپتەۋ كەزىندە جەكە قۇرىلىس سالىناتىن ءبىر تۇرعىن ءۇيدىڭ اۋدانى جوسپارلانعان 140 شارشى مەتردەن ءىس جۇزىندە 173 شارشى مەتر شىققان. ول جوسپارلانعان 48,7 مىڭ تۇرعىن ۇيدەن 40,7 مىڭ تۇرعىن ۇيگە دەيىن تومەندۋىنە سەبەپ بولدى. كوپپاتەرلى تۇرعىن ۇيلەردەگى پاتەرلەر كولەمىندە دە وسىنداي جاعداي، ءبىر پاتەر 90 شارشى مەتردى قۇراۋى ءتيىس 114,4 مىڭ باسپانانى پايدالانۋعا بەرۋ جوسپارلانعان، ءىس جۇزىندە ورتاشا اۋدانى 110 شارشى مەتر 108,7 مىڭ تۇرعىن ءۇي بەرىلدى»، - دەدى ق. وسكەنبايەۆ ۇكىمەتتىڭ بۇگىنگى وتىرىسىندا.

ەكىنشىدەن، ق ر اۋماعى ارقىلى ترانزيت كولەمىنىڭ ءوسۋى بويىنشا جوسپارداعى 25,3 ميلليون توننا ورىندالمادى.

«ونىڭ سەبەبى - قىتاي حالىق رەسپۋبليكاسى تاراپىنان قاتاڭ سانيتارلىق شەكتەۋلەر ەنگىزىلدى، بۇل شەكارا ماڭىنداعى تەمىرجول وتكەلدەرىنىڭ وتكىزۋ قابىلەتىن 2 ەسەگە ازايتتى. ترانزيتتىك جۇكتەردىڭ نەگىزگى ۇلەسى قىتايعا تيەسىلى ەكەنىن ەسكەرسەك، بۇل ترانزيتتىك تاسىمالداردىڭ جالپى كولەمىنىڭ شامامەن %70 ى نەمەسە 15,4 ميلليون توننادان استامىن قۇراعاندىقتان جوسپارعا قول جەتكىزىلمەدى. ۇشىنشىدەن، بۇل جاعدايلار ترانسكاسپي باعىتىنداعى كونتەينەر اعىنىن ۇلعايتۋ كورسەتكىشىنە دە تەرىس اسەر ەتكەن. جوسپار بويىنشا 45 مىڭ جيىرما فۋتتىق بالاما بولعان، ناقتى ورىندالۋى شامامەن 41 مىڭ بولدى»، - دەپ ءتۇسىندىردى مينيستر.