اجار عينيات كوروناۆيرۋستىڭ تارالۋى قاشان تومەندەيتىنىن ايتتى
بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.
«قازىرگى ۆيرۋستىڭ ەرەكشىلىگىن، دەنساۋلىق ساقتاۋ جۇيەسىنىڭ جۇكتەمەسىن، اۋرۋدىڭ تارالۋىن ەسكەرە وتىرىپ، مينيسترلىك ساراپشىلارمەن بىرگە ەپيدەميلوگيالىق جاعدايدىڭ بولجامىن جاسادى. وعان سايكەس، تامىز ايىندا كوروناۆيرۋس ينفەكتسياسىنىڭ ورتاشا تاۋلىكتىك كورسەتكىشى 4 مىڭ جاعدايعا دەيىن وسەدى. ال قىركۇيەك ايىندا تومەندەيدى دەپ بولجاپ وتىرمىز»، - دەدى ا. عينيات. ونىڭ ايتۋىنشا، قازىرگى كەزدە قازاقستاندا حالىقتى ۆاكسينالاۋ ءارى رەۆاكسينالاۋ ءۇشىن ەكپەنىڭ ءۇش ءتۇرى بار. ياعني QazVac, Sinopharm, Pfizer ۆاكسينالارى ۇسىنىلىپ وتىر.
«جالپى، 1 ميلليون 350 مىڭنان استام دوزاسى بار. جىلدىڭ اياعىنا دەيىن ۇزدىكسىز يممۋنوپروفيلاكتيكانى قامتاماسىز ەتۋ ءۇشىن بيىلدىڭ سوڭىنا دەيىن 500 مىڭداي QazVac ۆاكسيناتسياسىن الۋ جانە بالالار مەن جۇكتى ايەلدەرگە Pfizer ۆاكسيناتسياسىنىڭ 300 مىڭ دوزاسىن الۋ جوسپارلانىپ وتىر، - دەدى مينيستر.
