باكۋدەگى پريمورە بۋلۆارىندا قازاقتىڭ كيىز ءۇيى تىگىلدى

باكۋ. قازاقپارات - باكۋ قالاسىنىڭ پريمورە بۋلۆارىندا (Dəniz Vağzali ماڭى، Reyhan مەيرامحاناسىنا قاراما- قارسى) قازاقستان مەن ازەربايجان اراسىنداعى ديپلوماتيالىق قارىم- قاتىناستاردىڭ ورناتىلعانىنا 30 جىل تولۋىن مەرەكەلەۋ اياسىندا قازاقتىڭ كيىز ءۇيى تىگىلدى، دەپ حابارلايدى قازاقپارات ءتىلشىسى.

بەلگىلى بولعانداي، 2022 -جىلعى تامىزدىڭ 6-31 -ارالىعىندا كيىز ۇيدە «Welcome to KZ» اقپاراتتىق- تۋريستىك ورتالىعى اشىلىپ، وندا ەكى كورمە وتكىزۋ جوسپارلانۋدا. ونىڭ ءبىرى - تۇراقتى كورمەدە قازاقستاننىڭ جارقىن جەرلەرى تۋرالى ستەندتەر، شىمبۇلاق تاۋ شاڭعىسى كۋرورتى (الماتى)، بايقوڭىر عارىشايلاعى، «قىران» سۇڭقار ورتالىعى ء(تىرى سۇڭقارمەن جانە ۆيرتۋالدى شىندىق الەمىندەگى سۇڭقارمەن اڭ اۋلاۋ)، «esentai Mall» ساۋدا ويىن- ساۋىق ورتالىعى (الماتى ق. )، «Air Astana» تۋريستىك باعىتتارى ۇسىنىلسا، اپتا سايىنعى وزگەرىستەر بولاتىن كورمەدە الماتى جانە شىمكەنت قالالارى، الماتى، تۇركىستان جانە ماڭعىستاۋ وبلىستارى وزدەرىنىڭ تۋريستىك الەۋەتىن كورسەتىپ، مادەني، كونتسەرتتىك جانە ويىن- ساۋىق باعدارلامالارىن وتكىزەدى.

كورمەگە كەلۋشىلەر قازاقتىڭ سالت- داستۇرىمەن تانىسىپ، بەينەروليكتەر تاماشالاپ، اۋەن تىڭداپ، ۇلى دالا ەلىنىڭ ۇلتتىق تاعامدارىنان ءدام تاتىپ، ەجەلگى كوشپەندىلەر الەمىنە ەنىپ، كادەسىيلار الۋعا مۇمكىندىك الادى. ءىس- شارالار قازاقستان ەلشىلىگى، «Discover Almaty» تۋريستىك كومپانياسى، «ەير استانا» اۋە كومپانياسى جانە قازاقستاننىڭ ازەربايجانداعى ساۋدا ءۇيىنىڭ قولداۋىمەن وتكىزىلۋدە.