كيىك سانى رەتسىز كوبەيسە، پاستەرەللەز سىندى اۋرۋلاردىڭ قاۋپى ارتادى - مينيستر
«كيىك سانى ەڭ كوپ ارتقان كەزى وتكەن عاسىردىڭ سەنسەنىنشى جىلدارى دەپ ەسەپتەلەدى. ول كەزدە كيىك باسى 1 ميلليون 200 مىڭعا جەتكەن بولاتىن. ال قازىر ءتولدىڭ ءوزىن ەسەپتەمەگەندە 1 ميلليون 318 مىڭ باس بار. سوندىقتان، ءبىز كيىك پوپۋلياتسياسىن ساقتاۋ جانە قالپىنا كەلتىرۋ باعىتىنداعى جۇمىستى ورىنداپ قويدىق دەۋگە بولادى، - دەدى ول سۇحبات بارىسىندا.
ۆەدومستۆو باسشىسىنىڭ پايىمىنشا، كيىك سانىنىڭ شەكتەن تىس كوپ بولۋى ەگىن مەن جايىلىمعا عانا ەمەس، وزدەرىنە دە زياندى.
«كيىك سانى كوبەيگەندە ءوز ارالارىندا جەمشوپكە، سۋعا، اۋماققا دەگەن باسەكە كۇشەيەدى. بۇل باسەكە كيىكتەردىڭ اعزاسىن السىرەتەدى. كيىك السىرەسە، اۋرۋشاڭدىعى ارتادى. ءبىز وتكەن جىلداردىڭ ستاتيستيكاسىن قارادىق. اۋسىل، پاستەرەللەز سياقتى اۋرۋلار كيىكتەردىڭ اراسىندا اراعا 3-5 جىل سالىپ قايتالانىپ وتىرادى. پاستەرەللەز دەرتى سوڭعى رەت 2015-جىلى كيىككە قاتتى تيگەنىن بىلەسىزدەر. 150 مىڭ باس قىرىلىپ قالعان بولاتىن. بۇل سول كەزدەگى كيىك باسىنىڭ 30 پايىزى ەدى. ال قازىرگىدەي كوبەيگەن كەزىندە ەپيزووتيالىق جاعداي تۋىنداسا، كيىك سانىن رەتتەۋ نەمەسە ءتيىمدى پايدالانۋ باعىتىندا قاجەتتى شارا قولدانباساق، قىرىلعان كيىكتىڭ سانى ول كەزدەگىدەن الدەقايدا كوپ بولۋى مۇمكىن. ءبىراق ماسەلەنى ءالى تىڭعىلىقتى زەردەلەۋ كەرەك. جۋىق ارادا ءتيىستى شەشىم شىعارامىز دەپ ويلايمىن»، - دەدى مينيستر.
ەسكە سالساق، پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا كيىك پوپۋلياتسياسىن رەتتەۋ ماسەلەسى بويىنشا ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆكە سوگىس جاريالاعان ەدى.
