تۇركياداعى ايا- سوفيا مەشىتىنە كەلۋشىلەر سانى رەكوردتىق كورسەتكىشكە جەتتى
جەرگىلىكتى جانە شەتەلدىك تۋريستەر ءۇشىن ايا- سوفيا مەشىتى - تۇركيانىڭ ەڭ تانىمال جەرلەرىنىڭ ءبىرى بولىپ سانالادى. 1985 -جىلى تاريحي ورىن يۋنەسكو- نىڭ بۇكىلالەمدىك مۇرالار تىزىمىنە ەنگىزىلدى. 1453 -جىلى ىستانبۇلدى جاۋلاپ العانعا دەيىن تۇركيانىڭ ايگىلى جەرى 916 جىل بويى شىركەۋ قىزمەتىن اتقاردى. وسىدان كەيىن 1934 -جىلعا دەيىن ول مۇسىلمان مەشىتى بولىپ سانالدى، ال كەلەسى 86 جىل ىشىندە 2020 -جىلعا دەيىن ول ادامدار ءۇشىن مۇراجاي رەتىندە اشىلدى. 2020 -جىلدىڭ 10- شىلدەسىندە تۇرىك سوتى ايا- سوفيانى مۇراجاي دەپ ساناعان سول جىلدارداعى مينيسترلەر كابينەتىنىڭ بۇرىن قابىلداعان وكىمىنىڭ كۇشىن جويدى. عيمارات بۇرىنعى ماقساتىنا قايتارىلىپ، سول جىلدىڭ 24- شىلدەسىندە تۇركيا پرەزيدەنتى ر. ەردوعان پاندەمياعا قاراماستان، جۇزدەگەن ءدىندار مۇسىلمانمەن بىرگە مەشىتتىڭ ىشىندە ناماز وقىدى.
ىستانبۇل ءمۇفتيىنىڭ ورىنباسارى احمەت اكتيۋركوگلۋنىڭ ايتۋىنشا، عيمارات مارتەبەسىنىڭ مۇراجايدان مەشىتكە اۋىسۋى - يسلام تاريحىنداعى وتە ماڭىزدى وقيعا. عاجايىپ عيمارات كوپتەگەن ءدىندارلار مەن تۋريستەردى قىزىقتىرعان، ال قۇربان ايت مەرەكەسى كەزىندە كەلۋشىلەر ەرەكشە قىزىعۋشىلىق تانىتقان.
«الەمنىڭ كوپتەگەن قاسيەتتى ورىندارى سياقتى، ايا- سوفيا دا كەلۋشىلەر تاراپىنان سۇرانىسقا يە. ول، اسىرەسە قۇلشىلىق ەتۋ ءۇشىن قايتا اشىلعاننان كەيىن جەرگىلىكتى جانە شەتەلدىك تۋريستەردىڭ نازارىن اۋداردى. اشىلعاننان كەيىنگى ەكىنشى جىلى مەشىت 6,5 ميلليوننان استام ادامدى قابىلدادى، ال ەلدەگى ۇزاق دەمالىس كەزىندە كۇن سايىن 120 مىڭنان استام ادام ايا- سوفياعا كەلگەن. بەلگىلى بولعانداي، الەمنىڭ تۇكپىر- تۇكپىرىنەن ادامدار مەشىتكە تاڭ نامازىنا بارادى»، - دەپ اتاپ ءوتتى ول.
اۆتور: اياۋلىم التىنبەك
