بيىل كارتوپ ەكسپورتتاۋعا تولىق مۇمكىندىگىمىز بار - ەربول قاراشوكەيەۆ

نۇر-سۇلتان. قازاقپارات - بيىل قازاقستاننىڭ كارتوپ ەكسپورتتاۋعا مۇمكىندىگى بار. بۇل جايىندا ق ر اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.

«كارتوپتىڭ ىشكى نارىقتاعى ايلىق قاجەتتىلىگى - 152,7 مىڭ توننا. اكىمدىكتەردىڭ اقپاراتى بويىنشا، بۇگىنگى تاڭدا كارتوپ قورى 124,9 مىڭ توننا بولادى. ماۋسىم ايىنان باستاپ ەرتە پىسەتىن كارتوپ جينالىپ جاتىر. ونىڭ جالپى كولەمى 270,9 مىڭ تونناعا جەتتى. تامىزدىڭ ءبىرىنشى جارتىسىندا 7,8 مىڭ توننا جيناۋ جوسپارلانعان. بۇل ىشكى نارىقتى مولىقتىرۋعا جانە كارتوپ باعاسىنىڭ تۇراقتانۋىنا ىقپال ەتكەنىن ايتا كەتكىم كەلەدى. وسى ايدىڭ باسىنان بەرى كارتوپتىڭ باعاسى %5 تومەندەدى. قىركۇيەكتەن باستاپ كۇزگى كارتوپتى جيناۋ باستالادى، ونىڭ كولەمى 4 ميلليون توننادان اسادى. بۇل ىشكى نارىقتىڭ قاجەتتىلىگىن تولىق قامتاماسىز ەتەدى جانە بەلگىلى ءبىر كولەمدى ەكسپورتقا جونەلتۋگە مۇمكىندىك بەرەدى»، - دەدى مينيستر ورتالىق كوممۋنيكاتسيالار قىزمەتىندە وتكەن بريفينگىدە.

ونىڭ مالىمەتى بويىنشا، قىرىققابات پەن ءسابىز نارىعىندا جاعداي تۇراقتى.

«ەرتە پىسەتىن قىرىققابات پەن ءسابىز كولەمى كۇزگى ەگىن جيناعانعا دەيىن ىشكى نارىقتى قامتاماسىز ەتۋگە جەتكىلىكتى. تامىزدىڭ سوڭعى ونكۇندىگىنەن باستاپ كوكونىس ونىمدەرىنىڭ كۇزگى ءونىمى نارىققا شىعادى دەپ كۇتىلۋدە»، - دەدى ۆەدومستۆو باسشىسى.

سونداي-اق، ول بيىلعى بيداي شىعىمىنا بولجامىن ايتتى.