ەربول قاراشوكەيەۆ قانت باعاسىنىڭ شارىقتاۋىنا نە سەبەپ بولعانىن ايتتى
ءمينيستردىڭ ايتۋىنا قاراعاندا، برازيليانىڭ قانت زاۋىتتارى قانتتى تەك الدىن الا تولەۋ ارقىلى جانە ۇلكەن كولەمدە ساتادى. سوندىقتان قازىر ەۋرازيا ەكونوميكا وداعىنان تىس نارىقتان كەلەتىن ونىمگە تاۋەلدى بولىپ قالعان قازاقستان سياقتى ەلدەر ەكى ورتادا Louis Dreyfus Company سياقتى ءىرى ترانسۇلتتىق كومپانيالاردىڭ دەلدالدىعىنا جۇگىنۋگە ءماجبۇر.
«ترانسۇلتتىق كومپانيالار برازيليادان قانتتى 60 مىڭ توننادان ساتىپ الىپ، قارا تەڭىز پورتتارىنا اپارادى. سودان كەيىن عانا قارا تەڭىز ايلاعىنان ت م د ەلدەرىنە قانتتى از كولەمدە جەتكىزەدى. كورشى ەلدەردەگى گەوساياسي جاعدايعا بايلانىستى تۋىنداعان لوگيستيكالىق پروبلەمالار وسى قانتتىڭ ءوزىنىڭ كەشىگىپ جەتۋىنە تۇرتكى بولدى. ەگەر بۇرىن رەسەي فەدەراتسياسى مەن بەلارۋس رەسپۋبليكاسىنان يمپورت كەزىندە اق قانتتى جەتكىزۋ مەرزىمى 4-10 كۇنتىزبەلىك كۇنگە دەيىن بولسا، قازىرگى ۋاقىتتا رەسەي فەدەراتسياسى قانت اكەتۋگە تىيىم سالعاننان كەيىن ءۇشىنشى ەلدەردەن قانت جەتكىزۋ مەرزىمى 90 كۇنگە ۇزاردى»، - دەدى ەربول قاراشوكەيەۆ.
سونداي-اق، ول قازىرگى تاڭدا الەم بويىنشا قانت پەن ونىڭ شيكىزاتى نەگىزىنەن برازيليا مەن ءۇندىستاننان الىنىپ جاتقانىن ايتتى.
«ولاردىڭ ءوندىرىس كولەمى شامامەن 800 ميلليون توننانى نەمەسە الەمدىك نارىقتىڭ شامامەن %60 ىن قۇرايدى. برازيليادان قانت پەن قۇراق شيكىزاتىنىڭ يمپورتى قارا تەڭىزدەگى گرۋزيا پورتتارى ارقىلى جەتەدى. گرۋزيا پورتتارىنىڭ وتكىزۋ قابىلەتىنىڭ شەكتەۋلىلىگى، ينفراقۇرىلىم مەن كولىك كەمەلەرىنىڭ جەتكىلىكسىزدىگى كەپتەلىسكە اكەلىپ سوقتىرۋدا. ءۇندىستاننان قانت يمپورتى كەزىندە حايراتون اۋعان شەكارا وتكەلىندە جۇكتەردىڭ جينالۋى بايقالادى. بۇل تاۋارلاردى رەسىمدەۋ مەن تيەۋ راسىمدەرىنىڭ سوزىلۋىنا اكەلەدى. وسىلايشا، بۇرىن ورنىققان بۇكىل لوگيستيكالىق بايلانىس بۇزىلعان. بۇل لوگيستيكانىڭ جانە قازاقستانعا قانت پەن شيكىزاتتى جەتكىزۋ مەرزىمىنىڭ ۇزارۋىنا اكەپ سوقتى. قالىپتاسقان جاعداي قانت باعاسىنىڭ وسۋىنە اكەلدى. وسىلايشا، قانت شيكىزاتى قۇنىنىڭ، كولىك شىعىندارىنىڭ، سونداي-اق وڭدەۋ شىعىندارىنىڭ قىمباتتاۋى بايقالادى»، - دەدى مينيستر.
ەسكە سالساق، ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە سوگىس جاريالاعان ەدى.
