سايرام اۋدانىندا ساۋناعا كەلگەن جىگىتتى ۇرىپ ولتىرگەن كۇزەت قىزمەتكەرلەرى سوتتالدى

سايرام. قازاقپارات - تۇركىستان وبلىسى، سايرام اۋدانىندا ساۋناعا كەلگەن جىگىتتەردى اياۋسىز سوققىعا جىققان كۇزەت قىزمەتكەرلەرى سوتتالدى.

سەگىز اي بۇرىن بولعان قىلمىستى وقيعا كەزىندە 27 جاستاعى ازامات ەسىن جيماستان كوز جۇمعان ەدى، دەپ حابارلايدى قازاقپارات ءتىلشىسى.

سايرام اۋداندىق سوتىنىڭ مالىمەتىنشە، اتالعان قىلمىستىق وقيعا بويىنشا 5 ايىپتالۋشىعا قاتىستى ۇكىم شىقتى. سوتتالۋشىلاردىڭ ءبىرى - 9 جىل، ەندى بىرەۋى - 8 جىلعا باس بوستاندىعىنان ايىرىلدى. تاعى 3 ايىپتالۋشى قىلمىستىق كودەكستىڭ «بۇزاقىلىق» بابىمەن كىنالى دەپ تانىلىپ، ولارعا 2 جىل 6 اي باس بوستاندىعىن شەكتەۋ جازاسى تاعايىندالدى.

«ايىپتالۋشىلاردىڭ ءىس ارەكەتتەرى قىلمىستىق كودەكستىڭ 106-بابى 3-بولىگىمەن، ورىنباساروۆ پەن ومىرالىگە قاتىستى ءىس 106-باپتىڭ 3-بولىگىمەن جانە 293-باپتىڭ 2-بولىگى 1-2 باپتارىمەن سارالاندى. قالعان سوتتالۋشىلار «ق ر تاۋەلسىزدىگىنىڭ 30 -جىلدىعىنا وراي» جاريالانعان راقىمشىلىق جاساۋ تۋرالى زاڭىنا ساي قىلمىستىق جاۋاپكەرشىلىكتەن بوساتىلدى»، - دەدى سايرام اۋداندىق سوتىنىڭ ءتوراعاسى قۇرمانعالي دۇيسەبەكوۆ.

سونىمەن قاتار، قايتىس بولعان ەلامان مالىكوۆتىڭ زاڭدى وكىلدەرى بەرگەن ازاماتتىق تالابى ءىشىنارا قاناعاتتاندىرىلىپ، ايىپتالۋشىلاردىڭ بىرىنەن جابىرلەنۋشى تاراپقا 4,5 ميلليون تەڭگە مورالدىق زالال ءوندىرىلدى. ۇكىم ءالى زاڭدى كۇشىنە ەنگەن جوق.

ەسكە سالايىق، وسىدان 8 اي بۇرىن سايرام اۋدانىنداعى دەمالىس كەشەنىنە كەلگەن 4 جىگىتتى كۇزەت اگەنتتىگىنىڭ قىزمەتكەرلەرى تەپكىگە جىققان بولاتىن. سالدارىنان جابىرلەنۋشىلەردىڭ ءبىرى قايتىس بولىپ، تاعى ۇشەۋى زارداپ شەككەن ەدى. كەيىن كۇزەت قىزمەتىنىڭ وكىلدەرى ۇستالىپ، ولارعا قاتىستى سوت وتىرىسى بىرنەشە ايعا سوزىلدى.