شەتەل ارحيۆتەرىنەن احمەت بايتۇرسىن ۇلى مەن «الاش» قايراتكەرلەرى تۋرالى دەرەكتەر ىزدەستىرىلىپ جاتىر
بۇل تۋرالى ءتىل ساياساتى كوميتەتىنىڭ ءتوراعاسى ادىلبەك قابا Facebook-تەگى پاراقشاسىندا جازدى.
«ۇلت ۇستازى احمەت بايتۇرسىن ۇلى مەن «الاش» قوزعالىسىنىڭ باسقا دا كورنەكتى قايراتكەرلەرى تۋرالى شەتەل ارحيۆتەرىندە ساقتالعان دەرەكتەردى ىزدەستىرىپ، تابىلعان جاعدايدا ولاردى عىلىمي اينالىمعا ەنگىزۋ ءۇشىن ءتىل ءبىلىمى، ادەبيەت جانە تاريح سالاسى عالىمدارىنان قۇرالعان جۇمىس توبى جاساقتالدى. ون ادامنان تۇراتىن ەكسپەديتسيانىڭ العاشقى لەگى جوسپارعا سايكەس جانە الاشتانۋشى، احمەتتانۋشى عالىمداردىڭ ۇسىنىستارى بويىنشا رەسەيدىڭ ماسكەۋ، سانكت-پەتەربۋرگ قالالارىنداعى، تاتارستاننىڭ قازان قالاسىنداعى مەملەكەتتىك ارحيۆتەرىنە بارىپ، قازاق اعارتۋشىلارىنىڭ ەڭبەكتەرىن ىزدەستىرىپ قايتتى. بۇگىنگى كۇنى بۇل جۇمىستار ورىنبور وبلىسىنىڭ مەملەكەتتىك ارحيۆى مەن ومبى وبلىسىنىڭ تاريحي ارحيۆىندە جۇرگىزىلۋدە»، - دەپ جازدى كوميتەت باسشىسى.
ونىڭ ايتۋىنا قاراعاندا، الدا تاشكەنت، ترويتسك، حەلسينكي قالالارىنداعى ارحيۆتەردى ارالاۋ جوسپارلانعان.
«بۇرىن ەشبىر جەردە جاريالانباعان تىڭ دەرەكتەر تابىلىپ جاتسا، جوسپارلانعان جيناققا ەنىپ، كوپشىلىك كوزايىمىنا اينالادى. جوبا اياسىنداعى العاشقى ەكى اي تەك قانا ۇيىمداستىرۋشىلىق جۇمىستارعا ارنالسا، قالعان ءتورت اي ىشىندە ارحيۆتەردەن ءتيىستى ماتەريالدار ىزدەستىرۋ، تەحنيكالىق وڭدەۋ، ساراپتاۋ جانە جيناقتى ازىرلەۋ جۇمىستارى جۇرگىزىلمەكشى»، - دەيدى ادىلبەك قابا.
ەسكە سالساق، ق ر مەملەكەتتىك كەڭەسشىسى ەرلان قاريننىڭ توراعالىعىمەن احمەت بايتۇرسىن ۇلىنىڭ 150 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيانىڭ وتىرىسى ءوتىپ، الماتىدا ۇلت ۇستازىنىڭ ەسكەرتكىشى ورناتىلاتىنى ءمالىم بولعان.
