قازاقستاندا ج و و- دا وقىتۋ فورماتى قالاي وزگەرەدى - ساياسات نۇربەك
بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى، دەپ حابارلايدى قازاقپارات ءتىلشىسى.
«قازىر وتاندىق عىلىمنىڭ نەگىزگى پروبلەماسى - عىلىمي زەرتتەۋلەرىمىز، جۇزدەن استام عىلىمي-زەرتتەۋ ورتالىقتارىمىز، عىلىمي ينستيتۋتتارىمىز ج و و- عا نەگىزدەلگەن تەحنوپارك پەن عىلىمي زەرتتەۋلەر، ونەركاسىپ، ءوندىرىس، ناقتى كومپانيالاردىڭ تالاپتارىمەن، وندىرىستىك پروتسەستەرمەن ۇشتاستىرىلماعان. ياعني، عىلىم ءوز بەتىمەن، ءوندىرىس ءوز بەتىمەن، ەكونوميكا ءوز بەتىمەن ءجۇر. سوندىقتان عىلىم سالاسىندا دا ءبىزدىڭ نەگىزگى ماقساتىمىز - وسى ەكى دۇنيەنى ۇشتاستىرۋ. وتانداستارىمىزعا قاراپايىم سۇراق قويساق - قازاقستاندىق عىلىمعا سەنەسىز بە دەپ سۇراساق، وكىنىشكە وراي، جوق دەگەن جاۋاپ الامىز. سول سەنىمدى قايتارۋىمىز كەرەك. عالىمداردى جاڭا كەيىپكەرلەر رەتىندە ولاردىڭ مارتەبەسىن قايتارۋىمىز كەرەك»، - دەدى ساياسات نۇربەك ق ر پرەزيدەنتى تەلەراديوكەشەنىنىڭ «3 سۇراق» باعدارلاماسىندا.
سونىمەن بىرگە، عىلىم ءمينيسترى ج و و- لاردى زەرتتەۋ جانە قولدانبالى زەرتتەۋ ورتالىقتارىنا اينالدىرۋ قاجەتتىگىن ايتتى.
«نەگە دەسەڭىز، قاراپايىم ادام مەكتەپتە 11 جىل وقيدى، بۇل - پەداگوگيكالىق مودەل. ال ۋنيۆەرسيتەتكە كەلگەندە پەداگوگيكالىق ەمەس، زەرتتەۋ مودەلىمەن جۇمىس ىستەۋ كەرەك. ياعني وندا زەرتتەۋدى، ىزدەنۋدى، سىني ويلاۋدى، اقپاراتپەن جۇمىس ىستەۋدى ۇيرەتىپ، ەڭبەك نارىعىنا دايىنداۋىمىز كەرەك. ال بىزدە 70-80 پايىز ۋنيۆەرسيتەتتە - سول ءدارىس، سول سىنىپ، تاقتاعا شىعارۋ، ءۇي جۇمىسىن تەكسەرۋ. سوندىقتان بۇل مودەل وزگەرۋى كەرەك. كەلەسى جىلدان باستاپ، ءبىز ەڭ مىقتى ج و و نەگىزىندە ارنايى ورتالىقتار اشامىز. ياعني 120 ج و و- نى ءبىر ساتتە، ءبىر جىلدا كوشىرۋ قيىنعا تۇسەدى، ونداي رەسۋرسىمىز جوق. ءبىراق ءبىز پيلوتتى تۇردە ءار وڭىردە 2-3 ءبىلىم وشتاقتارىنان باستاپ، زەرتتەۋ مودەلىنە كوشىرۋدى باستايمىز. ياعني، مازمۇنى، ادىستەمەسى، ءبىلىم بەرۋ مودەلى وزگەرىپ، ەندى ج و و- لار قولدانبالى عىلىممەن اينالىساتىن مودەلگە كوشەدى. كەلەسى جىلدان باستاپ، التى وڭىرلىك ۋنيۆەرسيتەت نەگىزىندە تەحنوپاركتەر اشامىز، ياعني سول ج و و- دا ءبىلىم بەرگەن پروفەسسورلار، ماگيسترانتتار، دوكتورانتتار، باكالاۆرلار وزدەرى كۇندەلىكتى ءبىلىم الىپ قانا قويماي، زەرتتەۋمەن دە اينالىسۋى كەرەك. تەحنوپارك ارقىلى، پاتەنت ارقىلى سول زەرتتەۋلەردى قولدانبالى زەرتتەۋلەرگە اينالدىرىپ، جەرگىلىكتى بيزنەس، جەرگىلىكتى ءوندىرىس وشاقتارىنىڭ پروبلەمالارىن شەشۋگە باعىتتالۋى كەرەك»، - دەپ ءتۇسىندىردى ساياسات نۇربەك.
بۇعان دەيىن ساياسات نۇربەك عىلىم مينيسترلىگى قالاي قۇرىلعانىن ايتىپ بەرگەن ەدى.
