اۋىل مۇعالىمى «بولاشاق» ستيپەندياسىمەن ا ق ش-تىڭ ۋنيۆەرسيتەتىنە وقۋعا ءتۇستى
مۇعالىم ا ق ش-تىڭ جەتەكشى جوعارى وقۋ ورنى - وڭتۇستىك فلوريدا ۋنيۆەرسيتەتىندە «ماتەماتيكالىق ءبىلىم بەرۋ» ماماندىعى بويىنشا ماگيستراتۋرادا وقيدى. پەداگوگ ينتەرنەت جەلىسىندەگى ونلاين ساباقتار مەن دارىستەردىڭ كومەگىمەن اعىلشىن ءتىلىن باستاپقى دەڭگەيدەن جوعارى دەڭگەيگە دەيىن مەڭگەرگەن. گۇلزيا شەت ءتىلىن كۇنىنە 5-6 ساعات بويى وقىدى. وسىنىڭ ارقاسىندا ول IELTS ەمتيحانى بويىنشا 9 جوعارى بالدان 7 بالل جيناپ، ا ق ش- تىڭ ەڭ بەدەلدى جوعارى وقۋ ورنىنا ءتۇستى.
«مەن اۋىلدان شىقپاي-اق، «بولاشاق» ستيپەندياسىن تاعايىنداۋعا كونكۋرستىق ىرىكتەۋدەن ءساتتى ءوتتىم. قاراپايىم اۋىل مەكتەبىندە وقىدىم، قازىر سول اۋىل مەكتەبىندە جۇمىس ىستەيمىن. الەمدەگى ەڭ ۇزدىك ۋنيۆەرسيتەتتە وقۋعا مۇمكىندىگىم بولاتىنىن ءتىپتى ەلەستەتە دە المادىم. ءبىلىم مەن وزىڭە دەگەن سەنىم ءارقاشان قالاعان نارسەڭە جەتۋگە كومەكتەسەتىنىنە سەنىمدىمىن. شاكىرتتەرىم دە الەمدەگى ەڭ ۇزدىك ءبىلىم العانىن قالايمىن. ولار مەنەن ۇلگى الىپ، شابىتتانادى دەپ ۇمىتتەنەمىن»، - دەيدى گۇلزيا قۇرمانقان.
ايتا كەتەيىك، كادرلاردى شەتەلدە دايارلاۋ جونىندەگى رەسپۋبليكالىق كوميسسيا شەشىمىمەن 2022 -جىلدىڭ العاشقى اعىنىندا ستيپەنديا 199 قازاقستاندىققا تاعايىندالدى. ولاردىڭ ىشىندە 29 ستيپەنديا پەداگوگتار مەن وقىتۋشىلارعا بەرىلگەن.
