قازاق عالىمدارى ۆاتيكان كىتاپحاناسىنداعى تۇركى تاريحىنا قاتىستى قولجازبالاردى زەرتتەۋگە مۇمكىندىك الادى
عىلىم جانە جوعارى ءبىلىم ءمينيسترى ساياسات نۇربەك ۆاتيكاننىڭ قازاقستانداعى ەلشىسى فرەنسيس اسسيزي چۋلليكاتپەن كەزدەسۋىندە وعان وسىنداي ءوتىنىشىن ايتتى.
كەزدەسۋ بارىسىندا مينيستر قازاقستاننىڭ جوعارى ءبىلىم بەرۋ جۇيەسىندە بولىپ جاتقان رەفورمالار تۋرالى ايتتى.
ءوز كەزەگىندە چۋلليكاتت مىرزا ۆاتيكان مەن قازاقستان اراسىنداعى ءوزارا ىنتىماقتاستىق تۋرالى ءسوز قوزعادى.
- جوعارى ءبىلىم بەرۋ جۇيەسى قوعامنىڭ پروگرەسسيۆتى دامۋىنا نەگىزگى اسەر ەتەدى، - دەپ اتاپ ءوتتى فرەنسيس اسسيزي چۋلليكات.
عىلىم جانە جوعارى ءبىلىم ءمينيسترى ساياسات نۇربەك ۆاتيكان ەلشىسىن قازاقستاندىق عالىمداردىڭ شەتەلدىك جوعارى وقۋ ورىندارىنىڭ عىلىمي زەرتتەۋلەرىنە قاتىسۋىنا ىنتالاندىرۋعا باعىتتالعان «500 تاعىلىمداما» باعدارلاماسى تۋرالى حاباردار ەتتى جانە قازاقستاندىق عالىمداردىڭ ۆاتيكان كىتاپحاناسىنىڭ ەجەلگى قولجازبالارىنا قول جەتكىزۋىنە جاردەم كورسەتۋدى سۇرادى.
- قازاقستاندىق عالىمداردىڭ ۆاتيكان كىتاپحاناسىنا قولجەتىمدىلىگى تۇركى الەمىنىڭ تاريحىن تەرەڭىرەك زەرتتەۋگە مۇمكىندىك بەرەدى، - دەپ اتاپ ءوتتى ساياسات نۇربەك.
وسى جىلدىڭ ماۋسىم ايىندا نۇر-سۇلتاندا وتكەن حالىقارالىق تۇركى اكادەمياسىنىڭ عىلىمي كەڭەسىنىڭ V وتىرىسىندا تۇركى الەمىنىڭ جالپى وقۋ قۇرالدارى، سونىڭ ىشىندە «ورتاق تۇركى تاريحى» وقۋلىعى بويىنشا قورىتىندى شەشىم قابىلدانعان ەدى.
