وسكەمەن مەن سەمەي اراسىنا كەمە قاتىناۋى مۇمكىن

نۇر-سۇلتان. قازاقپارات - جاڭادان قۇرىلعان اباي وبلىسىندا ەرتىس وزەنى ارقىلى كەمە بايلانىسى جاندانۋى مۇمكىن. جەرگىلىكتى شەنەۋنىكتەر قازىر جوبانىڭ تيىمدىلىگىن زەرتتەۋدە. جولاۋشىلارعا ارنالعان سۋ كولىگىن قارجىلاندىرۋعا نيەتتى ينۆەستورلار دا بار.

ساراپشىلاردىڭ پىكىرىنشە، باستاما جۇزەگە اسسا، بۇل جاڭا وبلىستىڭ ەكونوميكاسى مەن تۋريزم سالاسىنا دا تىڭ سەرپىن بەرەدى.

ەكونوميست اسحات دۇيسەمبايەۆ بىلاي دەدى: «سەمەيدىڭ ترانسپورت- لوگيستيكالىق الەۋەتى زور. 30 جىل بويى وسىنى دۇرىس پايدالانبادىق. كەزىندە قالادا «جوعارى ەرتىس وزەن پاراحودى» دەگەن ۇلكەن مەكەمە بولعان. وسكەمەنگە 70 پاروحودقا دەيىن جۇرگەن. سونى قايتا قالپىنا كەلتىرۋ كەرەك. ەرتىس ارقىلى جولاۋشى تاسىمالىن دا، جۇك تاسىمالىن دا ۇيىمداستىرۋعا بولادى».

اسحات دۇيسەمبايەۆ، ەكونوميست، پروفەسسور:

- ەرتىس ءۇش مەملەكەتتىڭ اراسىندا جاتقان وزەن. قىتايدا باستالادى، 523 شاقىرىم، قازاقستاننان وتەدى 1810 شاقىرىم، رەسەي 2010 شاقىرىم. مۇنى نەگە پايدالانبايمىز؟ سەمەي ءوڭىرى داميدى. ەرتىس كوپ ادامدى جۇمىسپەن قامتيدى. جانە ەكونوميكاسى وركەندەيدى.

عالىمنىڭ ەسەپتەۋىنشە، ەرتىس بويىندا قىتايدىڭ 25 ميلليون، رەسەيدىڭ 5 ميلليون، قازاقستاننىڭ 2 ميلليوننان استام حالقى تۇرادى. ەڭ ماڭىزدىسى، وزەندى بويلاي بىرنەشە وندىرىستىك قالا ورنالاسقان. پروفەسسوردىڭ ايتۋىنشا، بۇل ۇلكەن نارىق. ەرتىستى ءتيىمدى پايدالانۋ سەمەيدىڭ عانا ەمەس، وسكەمەن مەن پاۆلوداردىڭ دا ەكونوميكاسىن كوتەرەدى ەكەن. ال كەمە بايلانىسىن جانداندىرۋ ءبىرىنشى كەزەكتە تۇرعىندار ءۇشىن قاجەت.

اسحات دۇيسەمبايەۆ، ەكونوميست، پروفەسسور:

- ويتكەنى وبلىستىڭ جولدارى ناشار. سوۆەت ۇكىمەتى تۇسىندا وسكەمەن، سەمەي، پاۆلودار قالالارى تەپلوحود راكەتا جۇرگەن. وسكەمەنگە ەكى ساعاتتا، پاۆلودارعا 4 ساعاتتا جەتەتىن.

بليتس:

- راكەتا جۇرسە جاقسى بولار ەدى. بالالارعا دا، بىزگە دە جاقسى.

- كىشكەنتاي كەزىمىزدە تەپلوحودتار توقتايتىن دۇكەن بولاتىن. ادامدار كەرەك نارسەلەرىن ساتىپ الاتىن. مەن ويلايمىن، كەرەك نارسە. تەپلوحود جۇرسە سەمەيدەن پاۆلودارعا بارۋشى ەدىك.

- كەمە بايلانىسى جاندانسا جاقسى بولار ەدى. وڭىرىمىزدەگى جولداردىڭ ساپاسى سىن كوتەرمەيدى. كەمە رەسۋرسىن پايدالانۋ وتە دۇرىس شەشىم دەپ ويلايمىن.

ازامات قاسىم، ءتىلشى:

- ەگەر ەرتىستە كەمە جۇرەتىن بولسا، سەمەيدەن پاۆلودارعا، وسكەمەنگە عانا ەمەس، وسكەمەن ارقىلى سۋ جولىمەن زايسانعا دەيىن بارۋعا مۇمكىندىك تۋادى. اباي وبلىسىنىڭ اكىمدىگى ەرتىستە جولاۋشىلار مەن تۋريستەرگە ارنالعان كەمە بايلانىسىن قايتا جانداندىرۋعا نيەتتى. بۇل ءىستى قولعا الۋعا دايىن ينۆەستورلار دا بار.

نۇرلان ۇرانحايەۆ، وبلىس اكىمى:

- بىزدە ينۆەستورلار بار. ۇسىنىستار بار. بۇرىن سەمەي مەن وسكەمەنگە، پاۆلودار مەن ومبىعا دەيىن «راكەتا» كەمەسى جۇرگەن بولاتىن.

ال «قازاقستان سۋ جولدارى» مەكەمەسى ماماندارىنىڭ پىكىرىنشە، اۋەلى جولاۋشىلاردان گورى جۇك تاسىمالىن جانداندىرۋ قاجەت. بۇل ەكونوميكالىق تۇرعىدان ءتيىمدى دەپ سانايدى. ويتكەنى قالادا سۋ ارقىلى كەلەتىن جۇك كولەمى از.

اندرەي كومپانەتس، «قازاقستان سۋ جولدارى» ر م ق سەمەي فيليالى ديرەكتورىنىڭ ورىنباسارى:

- پاۆلودار مەن ومبى قالاسىنان جۇك تاسۋعا بولادى. نەگىزى سەمەيگە وسى جۇمىستىڭ ءبارىن ۇيلەستىرەتىن ءبىر لوگيستيكالىق ورتالىق كەرەك. كەمە سانىن ارتتىرۋ قاجەت، ينفراقۇرىلىمدى نىعايتۋ كەرەك. جۇك قابىلدايتىن بەكەتتەر جۇمىس ىستەمەيدى. ونى دا رەتكە كەلتىرگەن ءجون.

سەمەيدە كەمە بايلانىسىن جانداندىرۋعا نەگىز جوق ەمەس. قالادا كەمە قۇراستىرۋ زاۋىتى جۇمىس ىستەيدى. كەزىندە مىڭعا تارتا جۇمىسشىسى بولعان كاسىپورىندا 100-گە جۋىق ادام قالعان. دۇركىرەپ تۇرعان ۋاقىتتا جىلىنا 100 بارجاعا دەيىن قۇراستىرعان. «قازىر تاپسىرىس از. مەملەكەت تاراپىنان قولداۋ بولسا جۇمىس قارقىنىن ارتتىرۋعا ءازىرمىز»، - دەيدى مۇنداعىلار.

ءامىر احمەدزيانوۆ، كەمە قۇراستىرۋ زاۋىتىنىڭ ديرەكتورى:

- زاۋىتتىڭ ءالى دە الەۋەتى زور. كەز كەلگەن كەمە تۇرلەرىن قۇراستىرا الامىز. ارينە قارجىلىق تۇرعىدا، كادر بويىنشا ماسەلەلەر بار. ماسەلەن، قازىر ەلىمىزدەگى ءبىر دە ءبىر وقۋ ورنىندا كەمە قۇراستىراتىن ماماندار دايارلانبايدى.

وسكەمەندىك ينجەنەر، كەمە جۇرگىزۋشىسى ۆلاديمير داۆىدوۆتىڭ پىكىرىنشە، وزەندەگى جولاۋشىلار تاسىمالىن قالپىنا كەلتىرۋ ءۇشىن ەڭ اۋەلى وزەن ارناسىن تەرەڭدەتۋ كەرەك. ەكى قالا اراسىندا كەمە جۇرگىزۋدىڭ شىعىنى كوپ. 3 جارىم ساعاتتىق سۋ جولىنىڭ وزىنە عانا 700 ليتر مولشەرىندە جانار- جاعارماي قاجەت.

www.24.kz