سولتۇستىك ماكەدونيا مەن البانيا ەۋرووداققا كىرۋ بويىنشا كەلىسسوزدەردى باستادى
بۇل تۋرالى قازاقپارات Euronews ارناسىنا سىلتەمە جاساپ حابارلايدى. ەۋروكوميسسيا ءتورايىمى ۋرسۋلا فون دەر ليايەن ەكى ەلدىڭ پرەمەر- مينيسترلەرىمەن اڭگىمەسىندە بۇل ۇدەرىس جىلدارعا سوزىلسا دا، قوسىمشا ساياسي جانە ەكونوميكالىق تۇراقتىلىق اكەلەدى دەپ ۇمىتەنەتىنىن ايتتى. «ينۆەستيتسيا اعىلىپ، ساۋدا بايلانىستارى جاقسارادى. ەنەرگەتيكا جانە كولىك سياقتى نەگىزگى سالالاردا تىعىز ىنتىماقتاستىق ورنايدى. ءسىز ە و قاراجاتىن كوبىرەك جانە بارىنشا ءتيىمدى پايدالانا الاسىز. دەمەك، جاڭا جۇمىس ورىندارى، جاڭا بيزنەس مۇمكىندىكتەرى پايدا بولادى. مىنە، سىزدەردىڭ ازاماتتارىڭىزدىڭ كوپتەن كۇتكەنى، ولار ءۇشىن ايانباي ەڭبەك ەتكەنى جانە ولارعا لايىقتى نارسە»، - دەدى ءتورايىم.
سولتۇستىك ماكەدونيا كانديدات مارتەبەسىن سوناۋ 2005 -جىلى العان. سودان بەرى ول ءوز ەلىندەگى بولگار ىقپالىن مويىنداۋ ءۇشىن كونستيتۋتسياسىن وزگەرتۋگە ءماجبۇر بولعان. سوفيا ماكەدون ءتىلىنىڭ شىعۋ تەگى تۋرالى ءوز نۇسقاسىن تالاپ ەتىپ وتىر. پارلامەنت سكوپەدە بولگاريامەن سولتۇستىك ماكەدونياداعى بولگار ازشىلىعىن تانۋ تۋرالى كەلىسىمدى بەكىتتى. پرەمەر- مينيستر بريۋسسەلدە سولتۇستىك ماكەدونيا ناتو-عا ينتەگراتسيالانعان سياقتى «ەۋرووداقپەن ەرتە ينتەگراتسيانىڭ وڭ ۇلگىسى» بولعىسى كەلەتىنىن مالىمدەدى.
«بۇگىن ءبىرىنشى ۇكىمەتارالىق كونفەرەنتسيادا بارلىق مۇشە ەلدەر ءبىزدىڭ ەو- عا مۇشەلىككە قادامىمىزدى قۇپتادى. بارلىق ساياساتكەرلەرلەرىمىز بۇل جولدى قولداۋعا مىندەتتى. بۇل سولتۇستىك ماكەدونيا رەسپۋبليكاسى ءۇشىن اناعۇرلىم تابىستى، دەموكراتيالىق جانە گۇلدەنگەن بولاشاقتى قۇرۋدىڭ جالعىز جولى»، - دەدى ديميتار كوۆاچەۆسكي.
بۇل كونفەرەنتسيا مەن كەلىسسوزدەرگە البانيا تاراپىنان ەل پرەمەر-ءمينيسترى ەدي راما قاتىستى. البانيا كانديداتتىققا 2014 -جىلدان بەرى ۇمىتكەر. البانيا مەن ماكەدونيانىڭ وداققا كىرۋىنىڭ ناقتى مەرزىمى بەلگىلەنبەگەن. مۇشەلىك تۋرالى كەلىسسوزدەردىڭ ءساتتى ءوتۋى ەلدەردىڭ ە و زاڭدارى مەن ەرەجەلەرىن، زاڭ ۇستەمدىگى قاعيداتتارىن قانشالىقتى جىلدام قولدانۋىنا، سونداي-اق سىبايلاس جەمقورلىقپەن ءساتتى كۇرەسۋگە كەپىلدىك بەرە الاتىنىنا بايلانىستى.
