مينيستر يتبالىقتاردىڭ قىرىلۋ سەبەبىن ءتۇسىندىردى

نۇر- سۇلتان. قازاقپارات – ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ جىل باسىنان بەرى بىرنەشە رەت تىركەلگەن يتبالىقتاردىڭ قىرىلۋ سەبەبىنە قاتىستى زەرتتەۋ قورىتىندىسىمەن تانىستىردى، دەپ حابارلايدى قازاقپارات ءتىلشىسى.

«جىل باسىنان بەرى قاراجامباس جانە ءتۇپقاراعان تۇبەگىنىڭ وڭتۇستىك- باتىس بولىگىنەن 220 يتبالىقتىڭ ولەكسەسى تابىلدى. ولەكسەلەر سولتۇستىك جانە ورتا كاسپي اكۆاتورياسىنداعى داۋىل مەن سولتۇستىك- باتىس جانە باتىستان سوققان جەلدىڭ اسەرىنەن جاعاعا شىعىپ قالعان. وسى جاعدايعا بايلانىستى ءبىزدىڭ بالىق شارۋاشىلىعى كوميتەتى ءتۇرلى عىلىمي ۇيىمدار جانە مەملەكەتتىك قۇزىرلى ورگاندارمەن بىرلەسىپ، زەرتتەۋ جۇمىسىن جۇرگىزە كەلە كەلەسى قورىتىندىعا كەلدى. تابىلعان يتبالىق ولەكسەلەرى ىدىراپ كەتكەندىكتەن ساراپتاما الۋ مۇمكىن بولمادى. سوعان قاراعاندا تەڭىز جانۋارلارى بىرنەشە اي بۇرىن ولگەن»، - دەدى سەرىكقالي برەكەشيەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ءمينيستردىڭ ايتۋىنشا، تەك 67 ولگەن يتبالىقتىڭ قاڭقاسىنا تەكسەرۋ جانە ولشەۋ جۇرگىزىلدى.

«ولاردىڭ 25 پايىزىنان نەمەسە 17 يتبالىق ولەكسەسىنەن ولىمگە الىپ كەلۋى مۇمكىن مەحانيكالىق اسەر ىزدەرى انىقتالدى. يتبالىقتار بالىقشىلاردىڭ اۋىنا ءتۇسىپ قالۋى، ءتۇرلى جاراقات الۋى نەمەسە يتبالىقتاردىڭ تىيىم سالىنعان اۋلاۋ قۇرالدارىنا تاپ بولۋى مۇمكىن»، - دەيدى ول.

زەرتتەۋ ناتيجەسىندە 19 يتبالىقتىڭ جاسىن انىقتاۋ مۇمكىن بولعان. اتاپ ايتقاندا، ولاردىڭ 52 پايىزى نەمەسە 10 يتبالىق 2021-2022 -جىلدىڭ قىسىندا تۋعان.

«يتبالىق كۇشىكتەرىنىڭ ءولىمىن ولاردىڭ السىزدىگىمەن، سۋىق سۋدان قاتىپ قالۋىمەن ياعني جاڭا تۋعان يتبالىقتاردىڭ بىردەن اشىق مۇزدى تەڭىزگە شىعۋىمەن بايلانىستىرىپ وتىر. 2021-2022 -جىلدىڭ قىسى جىلى بولدى، بۇل يتبالىقتار ءۇشىن قولايسىز. جوعارىدا اتالعان فاكتىلەر ولاردىڭ تابيعي ولىمىنە اكەلدى. جالپى تابىلعان يتبالىقتاردىڭ ەرەسەك جاسى 13 جىل. بارلىق ولەكسە تەكسەرۋدەن سوڭ سانيتاريالىق نورمالاردى ساقتاي وتىرىپ وڭدەلدى»، - دەيدى س. برەكەشيەۆ. ۆەدومستۆو باسشىسى يتبالىقتار ءولىمىنىڭ تاعى ءبىر سەبەبىن قاشاعان كەن ورنىنداعى تەرەڭدەتۋ جۇمىسىمەن بايلانىستىرىپ وتىر.