ەكى وبلىستا بەنزين قىمباتىراق ساتىلادى
14-شىلدەدە ەنەرگەتيكا مينيسترلىگىنىڭ «مۇناي ونىمدەرىنىڭ تىزبەسىن بەكىتۋ تۋرالى»، سونداي-اق «مۇناي ونىمدەرىن بولشەك ساۋدادا وتكىزۋگە شەكتى باعالاردى بەلگىلەۋ تۋرالى» بۇيرىقتارى كۇشىنە ەندى. بۇيرىقتارعا سايكەس قوستاناي جانە سولتۇستىك قازاقستان وبلىستارىندا اي-92 جانە اي-93 ماركالى بەنزيننىڭ شەكتى باعاسى ليترىنە 187 تەڭگە، باسقا وبلىستاردا بۇرىنعى 182 تگ/ليتر دەڭگەيىندە ساقتالادى. ەكى وبلىستا باعانى تۇزەتۋ بولشەك- ساۋدا ساتۋشىلاردىڭ مۇناي ونىمدەرىن ءوندىرۋشى زاۋىتتاردان الىستىعىنان لوگيستيكالىق شىعىندارمەن بايلانىستى. ەنەرگەتيكا مينيسترلىگىنىڭ مالىمەتىنشە، سونداي-اق مۇناي ونىمدەرى تىزبەسىنەن اي-95 ماركالى بەنزيننىڭ باعاسىن مەملەكەتتىك رەتتەۋ الىنىپ تاستالدى، ويتكەنى اي-95+ جانە جوعارى ونىمدەردى ءوندىرۋ كەزىندە قىمبات تۇراتىن يمپورتتىق قوسپالار مەن بەنزيندەردىڭ جوعارى وكتاندى كومپونەنتتەرىنىڭ ۇلكەن شىعىنى تالاپ ەتىلەدى. يمپورتتىق قوسپالاردىڭ باعاسى مۇناي باعالارىمەن جانە ۆاليۋتا باعامدارىمەن بايلانىستى.
«بۇيرىققا سايكەس ديزەل وتىنىنا شەكتى باعالار وزگەرمەيدى جانە قازاقستاننىڭ بارلىق وڭىرلەرىندە بۇرىنعى دەڭگەيدە قالىپ وتىر: اقمولا، اقتوبە، شىعىس قازاقستان، باتىس قازاقستان، قوستاناي، سولتۇستىك قازاقستان وبلىستارى بويىنشا، سونداي- اق اباي وبلىسىندا باعا ليترىنە 260 تەڭگەنى قۇرايدى، ال نۇر- سۇلتان، الماتى، شىمكەنت قالالارىندا، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ وبلىستارىندا، سونداي- اق جەتىسۋ، ۇلىتاۋ وبلىستارىندا - ليترىنە 230 تەڭگە»، - دەپ جازدى ۆەدومستۆو.
بۇيرىق جوبالارى 2022 -جىلعى 23-ماۋسىمدا «اشىق نقا» سايتىندا 2022 -جىلعى 8-شىلدەگە دەيىن ونلاين- تالقىلاۋ مۇمكىندىگىمەن جاريالاندى. اككرەديتتەلگەن ساراپتامالىق ۇيىمدارمەن كەلىسۋ كەزەڭىنەن ءوتتى، سونداي-اق قوعامدىق كەڭەستە قارالدى. بۇيرىقتار كۇنتىزبەلىك 180 كۇنگە جارامدى بولادى.
