ايماعامبەتوۆ كوللەدجگە تاپسىرۋشىلاردىڭ از بولۋىنىڭ سەبەبىن ايتتى

نۇر-سۇلتان. قازاقپارات - كوللەدجدەرگە تالاپكەرلەردى تارتۋ جۇمىسى جەتكىلىكسىز جۇرگىزىلىپ جاتىر. بۇل تۋرالى وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«اقپاراتتىق جۇمىس جەتكىلىكسىز جۇرگىزىلىپ جاتىر. بيىل 45 مىڭنان استام قوسىمشا گرانت ءبولىندى. بۇل دەگەنىمىز، 45 مىڭنان استام بالا تەگىن كوللەدجدە ءبىلىم الۋ مۇمكىندىگىنە يە بولدى دەگەن ءسوز. ءبىراق، ەندى وسى اقپاراتتى بارلىق مەكتەپ بىتىرۋشىلەرگە جانە 9 سىنىپ بىتىرۋشىلەرىنە جەتكىزۋمىز كەرەك. ولارمەن ءتيىستى جۇمىس جۇرگىزۋ قاجەت. ارينە، سىزدەر ولارعا بارماي قول قۋسىرىپ وتىرا بەرسەڭىزدەر، وندا ەشكىم بۇل اقپاراتتى بىلمەيدى، كوللەدجگە كەلمەيدى. سوندىقتان بۇل جۇمىس قازىرگى ۋاقىتتا جەتكىلىكسىز. وسى جۇمىستى ءبىلىم باسقارمالارى، كوللەدجدەر الەۋمەتتىك جەلىدە تاراتۋ ارقىلى جانداندىرسىن»، - دەدى اسحات ايماعامبەتوۆ مينيسترلىكتىڭ اپپارات جينالىسىندا.

ءمينيستردىڭ اتاپ وتۋىنشە، بىرنەشە وڭىردە كوللەدجدەرگە مەملەكەتتىك تاپسىرىس كولەمى تومەندەگەن.

«بۇل ماسەلەنى قايتا قاراستىرۋدى تاپسىرامىن. تومەندەۋ بولماۋى كەرەك. بۇل پرەزيدەنتتىڭ تاپسىرماسى بولعان. قوسىمشا رەسپۋبليكالىق بيۋدجەتتەن گرانت بەرىپ جاتىرمىز. ءبىراق، بۇل جەرگىلىك جەرلەردىڭ ماسەلەسى ەدى. بالالار جىلى بولعاننان كەيىن رەسپۋبليكالىق بيۋدجەتتەن قاراجات ءبولىپ جاتقاندا جەرگىلىكتى جەردە گرانت سانىن ازايتۋ قيسىنسىز. وعان جول بەرۋگە بولمايدى»، - دەدى ول.