ۇلتتىق بانك رۋبلدىڭ نىعايۋ سەبەبىن ءتۇسىندىردى
ق ر ۇلتتىق بانكىنىڭ رەسمي سايتىندا جاريالانعان سۇحباتتا عالىمجان ءپىرماتوۆ وسىنداي پايىم ايتتى، دەپ حابارلايدى قازاقپارات ءتىلشىسى.
«تەڭگەنىڭ رەسەي رۋبلىنە قاتىستى ايىرباس باعامى تىكەلەي قالىپتاسپايدى، ول تەڭگە مەن رۋبلدىڭ دوللارعا قاتىستى باعامىنا قاراي جەكەلەي قالىپتاسادى. تەڭگە/رۋبل نارىعى دەربەس قالىپتاسۋ ءۇشىن ءبىزدىڭ مەملەكەتتەر اراسىنداعى ساۋدا- ساتتىق تەڭەسۋى قاجەت. ال، قازىر ءبىزدىڭ رەسەيدەن اكەلەتىنىمىز، رەسەيگە اپاراتىنىمىزدان الدەقايدا كوپ جانە ءبىزدىڭ تاۋار ساتۋشىلارىمىز ءوز تاۋارلارىن رەسەيگە ساتقاندا تەڭگەگە ەمەس، ۆاليۋتاعا ساتقاندى تاڭدايدى. سوندىقتان، تەڭگەگە دەگەن سۇرانىس تومەن. قۇبىلمالى ايىرباس باعامى ساياساتىن ۇستانۋ - تەڭگەرىمسىزدىكتەردىڭ جيناقتالۋىن بولدىرمايدى جانە ونىمەن قاتار ەلدىڭ التىن- ۆاليۋتا رەزەرۆتەرىن ساقتاۋعا مۇمكىندىك بەرەدى. سوندىقتان، رۋبلمەن نەمەسە كەز كەلگەن باسقا ۆاليۋتامەن پاريتەتكە اسەر ەتۋ ماقساتىندا ۇلتتىق ۆاليۋتانىڭ ايىرباس باعامى بويىنشا كەز كەلگەن امالدار جاساۋعا جول بەرىلمەيدى»، - دەيدى ۇلتتىق بانك ءتوراعاسى.
سونداي-اق، ول رۋبلدىڭ كەنەت نىعايۋىنا اسەر ەتكەن ىشكى-سىرتقى فاكتورلارعا توقتالدى. «ماۋسىم ايىندا رۋبلدىڭ باعاسى بارلىق ۆاليۋتالارعا، ەڭ الدىمەن ا ق ش دوللارىنا قاتىستى ايتارلىقتاي نىعايدى. وسىنداي ايتارلىقتاي نىعايۋ رەسەي فەدەراتسياسىندا ەنگىزىلگەن كاپيتال قوزعالىسىن شەكتەۋ شارالارى، ەنەرگيا رەسۋرستارىن قوسا العاندا، نەگىزگى ەكسپورتتىق تاۋارلاردىڭ جوعارى باعالارى اياسىندا، يمپورتتىڭ ايتارلىقتاي قىسقارۋىمەن بىرگە ورىن الدى. بۇرىن ەنگىزىلگەن ۆاليۋتالىق شەكتەۋلەردىڭ ايتارلىقتاي جەڭىلدەۋىنە قاراماستان، رەسەي رۋبلى مۇناي مەن گازدىڭ جوعارى باعاسى مەن يمپورتتىڭ تومەن كولەمى اياسىندا نىعايۋىن جالعاستىردى»، - دەدى عالىمجان ءپىرماتوۆ.
بۇعان دەيىن ق ر ۇلتتىق بانكىنىڭ ءتوراعاسى بازالىق موشەرلەمەنىڭ نەگە وزگەرىسسىز قالعانىن تۇسىندىرگەن بولاتىن .
