جىل باسىنان بەرى الەۋمەتتىك ماڭىزى بار ازىق-تۇلىك باعاسى قانشا پايىزعا ءوستى

نۇر-سۇلتان. قازاقپارات – ق ر پرەمەر-ءمينيسترى ءاليحان سمايىلوۆ مەملەكەت باسشىسىنىڭ تاپسىرمالارىن ورىنداۋ بويىنشا كەڭەس وتكىزدى، دەپ حابارلايدى قازاقپارات ۇكىمەتتىڭ رەسمي سايتىنا سىلتەمە جاساپ.

جيىنداندا ازىق-تۇلىك باعاسىنىڭ ءوسۋىن تەجەۋ جونىندەگى شارالار، ينۆەستيتسيالار تارتۋ جانە وڭىرلەردەگى وزەكتى الەۋمەتتىك پروبلەمالاردى شەشۋ ماسەلەلەرى قارالدى.

پرەمەر-ءمينيستردىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆ جىل باسىنان بەرى الەۋمەتتىك ماڭىزى بار ازىق-تۇلىك تاۋارىنىڭ باعاسى %17,4 كوتەرىلگەنىن حابارلادى. پياز، قانت، ءسابىز، كارتوپ، قاراقۇمىق، ماكارون، ۇن جانە قىرىققابات باعالارى ەڭ كوپ وسكەن. ال تاۋىق جۇمىرتقاسىنىڭ باعاسى تومەندەگەن.

وڭىرلەر بولىنىسىندە ازىق-تۇلىك جەتىسۋ جانە جامبىل وبلىستارىندا (%19)، الماتى، ماڭعىستاۋ جانە ۇلىتاۋ وبلىستارىندا (%18,9)، سونداي-اق نۇر-سۇلتان جانە شىمكەنت قالالارىندا (%18,6) قىمباتتاعان.

پرەمەر-مينيستر ءالسىز كونتراكتاتسيا پياز بەن باسقا دا كوكونىس باعاسىنىڭ وسۋىنە اكەلەتىنىن اتاپ ءوتتى. ماسەلەن، پياز باعاسى قىزىلوردا وبلىسىندا جانە شىمكەنت قالاسىندا ەڭ كوپ وسكەن.

ءاليحان سمايىلوۆ «اينالىم سحەماسى» شەڭبەرىندە كاسىپكەرلىك سۋبەكتىلەرىن قارجىلاندىرۋ بويىنشا جۇمىستى جانداندىرۋدى، تۇراقتاندىرۋ قورلارىنىڭ تولىقتىرىلۋىن قامتاماسىز ەتۋدى جانە بولشەك ساۋدا ۇستەمەسىنە مونيتورينگ جۇرگىزۋدى تاپسىردى.

باسەكەلەستىكتى قورعاۋ جانە دامىتۋ اگەنتتىگىنە كوتەرمە جەتكىزۋشىلەردىڭ باعالىق ءسوز بايلاسۋ جانە باسەكەلەستىككە قارسى ءىس-ارەكەتتەرىن باقىلاۋدى كۇشەيتۋ، قارجىلىق مونيتورينگ اگەنتتىگىنە زاڭسىز قانت ساتۋشىلاردىڭ قىزمەتتەرىنىڭ جولىن كەسۋ، ونىڭ ىشىندە الەۋمەتتىك جەلىلەر مەن جارنامالىق قوسىمشالار ارقىلى ساتۋدى بولدىرماۋ، سونداي-اق قانت جەتكىزۋ ارنالارىن باقىلاۋعا الۋ تاپسىرىلدى.

«اۋىل شارۋاشىلىعى مينيسترلىگى ازىق-تۇلىكپەن قامتاماسىز ەتۋگە تالداۋ جۇرگىزىپ، يمپورتتىڭ قاجەتتى كولەمىن ايقىنداپ، وزىمىزدە ءونىم ءوندىرۋدى ۇلعايتۋ بويىنشا قوسىمشا شارالار قابىلداۋى قاجەت»، - دەدى ءاليحان سمايىلوۆ.

كۇن تارتىبىدەگى ەكىنشى ماسەلەنى قاراۋ بارىسىندا ۇكىمەتتىڭ ق ر ينۆەستيتسيالىق ساياساتىنىڭ جاڭا تۇجىرىمداماسىن قابىلداعانى اتاپ ءوتىلدى، ونىڭ شەڭبەرىندە نەگىزگى كاپيتالعا سالىنعان ينۆەستيتسيالار بويىنشا جاڭارتىلعان ينديكاتور 2026-جىلعا قاراي ج ءى و- ءنىڭ %25,1 دەڭگەيىندە بەلگىلەندى.

بۇل رەتتە بۇگىنگى كۇنى كەيبىر وڭىرلەردە نىسانالى كورسەتكىشتەرگە قول جەتكىزىلمەي وتىر. ماسەلەن، شىمكەنت بويىنشا ورىنداۋ كورسەتكىشى %47,3 دى، تۇركىستان وبلىسى بويىنشا - %49,1 دى، جامبىل وبلىسى بويىنشا - %65,8 دى قۇرايدى.

«ءاربىر ءوڭىر ءوزىنىڭ نىسانالى ينديكاتورلارىنا قول جەتكىزۋ بويىنشا جان-جاقتى شارالار قابىلداۋى قاجەت. بۇل جۇمىستى ەرەكشە باقىلاۋدا ۇستاۋ كەرەك»، — دەپ اتاپ ءوتتى پرەمەر-مينيستر.

كەڭەسكە قاتىسۋشىلار وڭىرلەردە جالاقى بويىنشا بەرەشەكتى بولدىرماۋ، ەڭبەك داۋلارىن شەشۋ جانە الدىن الۋ ماسەلەلەرىن، سونداي-اق ت ك ش جۇيەسىندە تاريفتەردىڭ ءوسۋ فاكتورلارىن تالقىلادى.

ۇكىمەت باسشىسى مەملەكەتتىك ورگاندارعا تالداۋ جانە بولجاۋ قىزمەتىن كۇشەيتۋدى، قازىرگى پروبلەمالىق جاعدايلار، سونداي-اق ولاردى شەشۋ ءۇشىن مەملەكەت قابىلداپ جاتقان شارالار بويىنشا ازاماتتارعا ەگجەي-تەگجەيلى جانە نەگىزدى تۇسىندىرۋلەردى قامتاماسىز ەتۋدى تاپسىردى.

ۇلتتىق ەكونوميكا مينيسترلىگىنە كوممۋنالدىق قىزمەتتەر تاريفتەرىنىڭ وزگەرۋىن باقىلاۋدا ۇستاۋ، يندۋستريا جانە ينفراقۇرىلىمدىق دامۋ مينيسترلىگىنە وڭىرلەردە كومىردى ۋاقىتىلى جەتكىزۋدى جانە ۇلەستىرۋدى قامتاماسىز ەتۋ، ەنەرگەتيكا مينيسترلىگىنە ىشكى نارىعىن ج ج م- مەن قامتاماسىز ەتۋ جونىندە شارالار قابىلداۋ تاپسىرىلدى.