مەككەگە قاجىلىققا اتتانعان قازاقستاندىقتار ءوز ميسسياسىن اياقتادى

نۇر-سۇلتان. قازاقپارات - قاجىلىققا اتتانعان قازاقستاندىقتار پارىز امالدارىن اياقتادى، دەپ حابارلايدى قازاقپارات ءتىلشىسى قازاقستان مۇسىلماندارى ءدىني باسقارماسىنا سىلتەمە جاساپ.

بيىل قاجىلىق پارىزىن وتەۋ ءۇشىن مەككەگە 4000 وتانداسىمىز اتتاندى. قازاقستاندىقتاردىڭ العاشقى لەگى 29-ماۋسىمدا ساپارعا شىققان ەدى. ولارعا 14 قاجىلىق كومپانيا قىزمەت كورسەتتى.

كەشە قازاقستاندىق قاجىلاردىڭ باسىم بولىگى قاجىلىقتىڭ نەگىزگى پارىزدارىن اياقتادى. پارىز وتەۋشىلەر كۇنۇزاق ارافادا تۇرىپ تىلەك تىلەگەن، مۇزداليفادا تۇنەپ تاڭ نامازىن وقىعان قاجىلار بۇگىن جاماراتتا شايتانعا تاس اتىپ، قۇربان شالدى. قاعباعا بارىپ پارىز تاۋابىن جاساپ، يحرامنان شىقتى.

ايتا كەتسەك، قازاقستاندا قاجىلىق كەزىندە ارنايى ميسسيا جۇمىس ىستەيدى. ونىڭ 5 جۇمىس باعىتى بار. ياعني قاجىلىقتى ۇيىمداستىرۋ، ۋاعىز- ناسيحات، العاشقى دارىگەرلىك كومەك، اقپارات جانە Call ورتالىعى. Call ورتالىققا قاجىلىق ساپار بارىسىنا قاتىستى 591 ساۋال كەلىپ ءتۇستى. سۇراقتاردىڭ دەنى ارافادا تۇرۋ، مۇزداليفادا تۇنەۋ، جاماراتتا شايتانعا تاس اتۋعا قاتىستى بولدى. سونداي-اق قاجىلار تاراپىنان قۇرباندىق شالۋعا قاتىستى سۇراقتار ءجيى جولداندى. قاجىلىق ساپار كەزىندە وتانداستارىمىزدىڭ دەنساۋلىعىنا 3 دارىگەر قاراپ، قاداعالادى.

ايتا كەتسەك، كەشەدەن باستاپ بارشا مۇسىلمان جۇرتى قۇربان ايتتى مەرەكەلەپ جاتىر.

فوتو: i.ytimg.com