ۇلتتىق بانك وكىلى ۆاليۋتانىڭ قازىرگى احۋالى تۋرالى ءتۇسىندىردى

نۇر-سۇلتان. قازاقپارات - ۇلتتىق بانكتىڭ مونەتارلىق وپەراتسيالار دەپارتامەنتىنىڭ ديرەكتورى نۇرجان تۇرسىنحانوۆ ۆاليۋتا نارىعىنداعى قازىرگى جاعداي تۋرالى ءتۇسىندىردى، دەپ حابارلايدى قازاقپارات.

ونىڭ پايىمىنشا، دامىعان جانە دامۋشى ەلدەردىڭ ۆاليۋتالارى ينفلياتسيا مەن گەوساياسي تۇراقسىزدىققا قارسى كۇرەس اياسىندا قىسىمعا ۇشىراپ وتىر. ۇلتتىق ۆاليۋتا دا ورنىعىپ قالعان ىشكى فاكتورلارعا بايلانىستى جانە سىرتقى وزگەرىستەردىڭ اسەرىنەن قۇبىلمالى كۇي كەشۋدە.

«دوللاردىڭ رەسمي باعامى اي باسىنان بەرى 12,16 تەڭگەگە نەمەسە 2,6 پايىزعا السىرەپ، 8 شىلدەدە 477,24 تەڭگەنى قۇرادى. بۇل ورايدا، ا ق ش دوللارىنىڭ جاھاندىق نىعايۋى، ەنەرگيا تاسىمالداۋشىلار باعاسىنىڭ تومەندەۋى، سونداي-اق قازاقستانداعى كاسپي قۇبىرى جەلىسى كونسورتسيۋمىنىڭ تەڭىز تەرمينالى قىزمەتىن توقتاتا تۇرۋ تاۋەكەلدەرى، سول سەبەپتەن نارىققا قاتىسۋشىلار سەنتيمەنتىنىڭ ناشارلاۋى، قازاقستاندىق كومپانيالاردىڭ يمپورتتىق وپەراتسيالارى تەڭگە ديناميكاسىنا اسەر ەتكەن نەگىزگى فاكتورلار بولدى. ا ق ش قازىناشىلىق وبليگاتسيالارى كىرىستىلىگىنىڭ ءوسۋى مەن ا ق ش دوللارىنىڭ نىعايۋى دامىعان، سول سياقتى دامۋشى ەلدەردىڭ ۆاليۋتالارىنا قىسىم جاسادى»، - دەدى ول.

نۇرجان تۇرسىنحانوۆتىڭ مالىمەتىنشە، DXY يندەكسى 7- شىلدەدە 107,13 دەڭگەيىنە دەيىن، ياعني 2,3 پايىزعا ءوستى، ال JPMorgan دامۋشى ەلدەرى ۆاليۋتالارىنىڭ يندەكسى 3,3 پايىزعا السىرەدى. ەۋرونىڭ ا ق ش دوللارىنا قاتىستى 1,016 دەڭگەيىنە دەيىن السىرەۋى شامامەن تەپە-تەڭدىككە جەتىپ، ەلەۋلى جاعداي ورىن الدى.

«7- شىلدەدەگى جاعداي بويىنشا، Brent ماركالى مۇناي باعاسى اي باسىنان بەرى 8,8 پايىزعا تومەندەپ، باررەلىنە 104,65 ا ق ش دوللارىن قۇرادى. ماسكەۋ بيرجاسىنداعى رەسەي رۋبلىنىڭ باعامى اي باسىنان بەرى 20 پايىزعا السىرەپ، 61,95 دەڭگەيىندە قالىپتاستى. ىشكى فاكتورلار اراسىندا يمپورتتىق وپەراتسيالاردى جۇزەگە اسىرۋ ءۇشىن ۆاليۋتاعا ساقتالىپ وتىرعان سۇرانىس، سىرتقى بورىشتاردى وتەۋ، سونداي-اق جەكە تۇلعالار تاراپىنان شەتەل ۆاليۋتاسىنا تۇراقتى سۇرانىس تەڭگە ديناميكاسىنىڭ نەگىزىن قالادى»، - دەدى ۇلتتىق بانك وكىلى.

جالپى العاندا، ەنەرگيا تاسىمالداۋشىلار باعاسىنىڭ تومەندەۋىنە بايلانىستى نارىققا قاتىسۋشىلار سەنتيمەنتىنىڭ ناشارلاۋى بايقالادى.

ەركىن وزگەرمەلى باعام جاعدايىندا تەڭگە ءۇشىن قۇبىلمالىلىقتىڭ ورىن الۋى - نارىقتاعى قالىپتى جاعداي.

ماماننىڭ ايتۋىنشا، اي باسىنان بەرى ۇلتتىق بانك ۆاليۋتالىق ينتەرۆەنتسيالار جۇرگىزگەن جوق. بۇل رەتتە قارجىلىق تۇراقتىلىققا تونەتىن قاۋىپتى بولدىرماۋ ءۇشىن ۆەدومتسۆو شامادان تىس باعام قۇبىلمالىعى كەزىندە ۆاليۋتا ساۋدا-ساتتىعىنا ارالاسۋ قۇقىعىن وزىنە قالدىرادى.

«قىسقا مەرزىمدى پەرسپەكتيۆادا تەڭگە ديناميكاسى يمپورتتىق وپەراتسيالار مەن دەمالىس ماۋسىمى اياسىندا قاتىسۋشىلار تاراپىنان شەتەل ۆاليۋتاسىنا سۇرانىستىڭ ارتۋىنا بايلانىستى بولادى. كورشىلەس وڭىرلەردەگى گەوساياسي احۋال، سونداي-اق الەمدىك نارىقتارداعى جاعدايلار دامۋشى ەلدەردىڭ ۆاليۋتالارىنا قاتىستى ينۆەستورلاردىڭ جالپى سەنتيمەنتىنە ىقپالىن ساقتايدى»، دەدى نۇرجان تۇرسىنحانوۆ.

ۇلتتىق بانك تەڭگەرىمسىزدىكتەردىڭ جيناقتالۋىن بولدىرمايتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانۋدى جالعاستىرا بەرەدى.