سۋ بەتىندە جۇگىرىپ، وتتان وتكەن: شىمكەنتتە شاولين مەكتەبىنىڭ شاكىرتى تۇرادى - فوتو

شىمكەنت. قازاقپارات - شىمكەنت قالاسىنىڭ تۋماسى بولاتبەك نۇرمانوۆ ءومىرىنىڭ ءۇش جارىم جىلىن گۋانجوۋداعى شاولين عيباداتحاناسىندا وتكىزگەن.

ول قىتاي جەرىندە قويان- قولتىق ۇرىستىڭ قىر-سىرىن مەڭگەرىپ، موناستىرداعى ۇستازداردان ءدارىس العان، دەپ حابارلايدى قازاقپارات ءتىلشىسى. اسكەري قىزمەتتەگى بولاتبەك نۇرمانوۆ 1980- جىلدارى اتاقتى شاولين عيباداتحاناسىنا قىزمەت بابىمەن بارعان. اسپان استى ەلىنە جەتكەن سوڭ، سونداعى شاكىرتتەرمەن شارشى الاڭعا شىعىپ، كۇش سىناسقان. ءتىپتى، چەمپيوناتتارعا قاتىسىپ، جەڭىس تۇعىرىنان دا كورىنگەن.

«بۇل ومىرىمدەگى ۇمىتىلماس ساتتەردىڭ ءبىرى»، - دەيدى بيىل 68 جاسقا تولاتىن ب. نۇرمانوۆ.

«جاس كەزىمدە سپورتپەن شۇعىلدانعان بولاتىنمىن. جاياۋ تاۋ تاستى كەزىپ موناستىرعا جەتتىم. ونداعىلار مەنى سىناپ كورگەن سوڭ، بىردەن قابىلدادى. بالا كۇنىمدە سپورتپەن شۇعىلدانعاندىقتان، سىناقتاردان قينالماي ءوتتىم» - دەيدى ول.

كەيىننەن بولاتبەك نۇرمانوۆ موناستىردا ءتۇرلى جاتتىعۋلاردى جاساۋدى ۇيرەنەدى. ساۋساقتى تىرەپ كەۋدەنى جەردەن كوتەرۋ، سۋ بەتىندە جۇگىرۋ، وتتان ءوتۋ، ءبىر اياقپەن تۇرۋ سەكىلدى ءادىس- تاسىلدەردى تەز- اق مەڭگەرىپ الادى. قاسىنداعى زامانداستارىمەن جەكپە- جەككە ءتۇسىپ، ءوزارا مىقتىنى انىقتايدى. قىلىشتىڭ ورنىنا تاقتاي ۇستاپ توبەلەسەدى. ونىڭ ايتۋىنشا، سۋ بەتىندە 4,5 مەترگە دەيىن جۇگىرىپ وتۋگە بولادى.

«عيباداتحانادا ءۇش ءتاسىلدى ۇيرەندىم: «قارا مىسىق»، «بوگومول»، «كوبرا». كەيىن 1981 -جىلى ۋ-شۋ بويىنشا قىتايدا وتكەن الەم چەمپيوناتىنا قاتىستىم. وندا قارسىلاستارىمدى ويسىراتا جەڭىپ، الەم چەمپيونى اتاندىم. ەڭ سوڭعى كەزدەسۋ قىتايلىقپەن ءوتتى. وتە اۋىر بولدى. ەسىمنەن ءبىر رەت تانىپ تا قالدىم. ال سوڭىندا ونى ەسىنەن تاندىردىم. ءتىپتى ورنىنان تۇرا الماي قالدى»، - دەيدى ول.

بولات نۇرمانوۆ شاولين عيباداتحاناسىنان قىلىش، شىنجىرلى تاياق جانە ارنايى فورماسىن الىپ كەلگەن. قىلىشتى رەستاۆراتسيالاۋ ءۇشىن ۇستاعا تاپسىرعان. ال شىنجىرلى تاياق ۇيىندە ساقتاۋلى تۇر. كيگەن كيىمىن شاكىرتتەرىنە سىيلاعان.

«مەن كوپ شاكىرت تاربيەلەدىم. شاولين مەكتەبىندە ۇيرەنىپ كەلگەن تاسىلدەرىمدى جاستارعا ۇيرەتتىم. العاشقىدا ۇيدە جاتتىعاتىنبىز، كەيىن تابيعات اياسىنا شىقتىق. شاكىرتتەرىمنىڭ بارشاسى دا بيىكتەردەن كورىندى. ءۇمىتىمدى اقتادى. ەشبىرى توبەلەستىڭ تاسىلدەرىن جامان جولعا پايدالانعان جوق. مەن سوعان قۋانامىن» - دەيدى ول.

قاريا قازىر دە كۇندەلىكتى جاتتىعۋلار جاساپ، ۋ- شۋ- دىڭ بايىپپەن جاسالاتىن ءادىس- تاسىلدەرىن قايتالاپ تۇرادى. ال قولدان جاسالعان اسپالى تۇلىپتى كۇندە ۇرىپ- تۇرۋ - ۇيرەنشىكتى ءىسى.

اۆتور: قايرات زاينيشەۆ