بەيبىت يسابايەۆ پرەزيدەنتكە جەتىسۋ وبلىسىنىڭ قازىرگى جاعدايى تۋرالى باياندادى

None
None
نۇر- سۇلتان. قازاقپارات - مەملەكەت باسشىسى جەتىسۋ وبلىسىنىڭ اكىمى بەيبىت يسابايەۆتى قابىلدادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

قاسىم- جومارت توقايەۆقا جەتىسۋ وبلىسىنىڭ قازىرگى الەۋمەتتىك- ەكونوميكالىق جاعدايى مەن دامۋ پەرسپەكتيۆالارى تۋرالى باياندالدى. بەيبىت يسابايەۆتىڭ ايتۋىنشا، اۋىل شارۋاشىلىعى مەن وڭدەۋ سەكتورىن دامىتۋعا باسا ءمان بەرىلەدى. سونداي- اق وڭدەۋ ونەركاسىبى، مينەرالدى شيكىزاتتى ءوندىرۋ جانە وڭدەۋ سالاسىندا قۇنى 730,3 ميلليارد تەڭگە بولاتىن 24 جوبانى جۇزەگە اسىرۋ جوسپارلانىپ وتىر. وسى رەتتە 3440 جۇمىس ورنى اشىلادى.

وبلىس اكىمى پرەزيدەنتكە ءوڭىر ەكونوميكاسىن دامىتۋ ءۇشىن تۋريزم سالاسىنىڭ مول الەۋەتى بار ەكەنىن ايتتى. بۇگىندە الاكول كولىنىڭ جاعالاۋىنداعى ينفراقۇرىلىمداردى دامىتۋعا، بالقاش كولى باعىتىنداعى جول قۇرىلىسىنا قاتىستى جۇمىستار جۇرگىزىلىپ جاتىر. پرەزيدەنت وبلىس تۇرعىندارىنىڭ ءال- اۋقاتىن ارتتىرۋ ماڭىزدى ەكەنىنە نازار اۋداردى. وسىعان بايلانىستى مەملەكەت باسشىسى وڭىردەگى سۋارمالى القاپتاردى ۇلعايتۋعا باعىتتالعان يرريگاتسيا جۇيەلەرىن جاڭارتۋ، قولجەتىمدى باسپانا قۇرىلىسىنىڭ كولەمىن ارتتىرۋ، جولداردى جوندەۋ، وبلىستاعى ەلدى مەكەندەردى گازبەن قامتۋ، ونەركاسىپتى، شاعىن جانە ورتا بيزنەستى دامىتۋ، پەداگوگتار مەن دارىگەرلەردىڭ تاپشىلىعىن جويۋ سياقتى ءبىرقاتار وزەكتى ماسەلەنى شەشۋ قاجەت ەكەنىن ايتتى. كەزدەسۋ سوڭىندا قاسىم- جومارت توقايەۆ بەيبىت يسابايەۆقا ازاماتتاردىڭ تۇيتكىلدى پروبلەمالارىن شەشۋ جانە جەتىسۋ وبلىسىن الەۋمەتتىك- ەكونوميكالىق تۇرعىدان ودان ءارى دامىتۋ ءۇشىن ءتيىمدى شارالار قابىلداۋدى تاپسىردى.

سوڭعى جاڭالىقتار