وقۋ مينيسترلىگى نازاربايەۆ مەكتەبىندەگى ءبىلىم گرانتى داۋىنا قاتىستى تۇسىنىكتەمە بەردى

نۇر-سۇلتان. قازاقپارات – ق ر وقۋ- اعارتۋ مينيسترلىگىنىڭ نازاربايەۆ زياتكەرلىك مەكتەبىنە قاتىستى شىققان داۋعا تۇسىنىكتەمە بەردى، دەپ حابارلايدى قازاقپارات.

ءبىز كوپشىلىكتىڭ جاعدايدى تۇسىنبەيتىنىن جانە نازاربايەۆ زياتكەرلىك مەكتەپتەرى مينيسترلىككە باعىنىشتى دەپ سانايتىنىن كورىپ وتىرمىز. وسى ورايدا «نازاربايەۆ زياتكەرلىك مەكتەبى» د ب ب ۇ-نىڭ تولىق دەربەستىگىن قامتاماسىز ەتەتىن ارنايى زاڭ بار ەكەنىن ەسكە سالعىمىز كەلەدى.

ياعني، ن ز م مەكتەپتەرى وقۋ-اعارتۋ مينيسترلىگىنە باعىنبايدى. سايكەسىنشە، تىلدەر بولىنىسىندە كۆوتا ءبولۋ، سىنىپتاردى جابدىقتاۋ، جاڭا مەكتەپتەر اشۋ ماسەلەلەرىن مينيسترلىك ەمەس، قامقورشىلىق كەڭەسى شەشەدى. تۇسىندىرەتىن ءبىر عانا ماسەلە بار. دالىرەك ايتقاندا، مينيستر گرانتتاردى تاعايىنداۋ جونىندەگى كوميسسيانىڭ ءتوراعاسى، الايدا ونىڭ سىنىپتارعا قابىلداۋ، سىنىپتاردى جيناقتاۋ جانە ونى اشۋ ساياساتىن انىقتاۋعا قۇقىعى جوق. سوندىقتان ءتوراعا قىزمەتى قايتا قارالادى. نەگىزگى شەشىمدەردى قابىلدايتىن ادامدار كونكۋرس كوميسسياسىنا ءتوراعالىق ەتۋى كەرەك»، - دەدى ق ر وقۋ-اعارتۋ مينيسترلىگىنىڭ مەكتەپكە دەيىنگى جانە ورتا ءبىلىم كوميتەتى باس ساراپشىسى ەرلان ماياەميروۆ.

وقىرماندارعا تۇسىنىكتى بولۋ ءۇشىن ايتا كەتسەك، الەۋمەتتىك جەلىدە نازاربايەۆ زياتكەرلىك مەكتەبىندە وقۋعا ۇمىتكەرلەرگە مەملەكەت تاراپىنان بەرىلەتىن «وركەن» گرانتىنىڭ سانىنا بايلانىستى رەزونانستى ۆيدەو تارادى. ونداعى مالىمەت بويىنشا، بيىل قازاق توبىنا تاپسىرعان وقۋشىلاردىڭ سانى ورىس توبىنا تاپسىرعان ۇمىتكەرلەردەن كوپ بولعانىنا قاراماستان، گرانت سانى تەڭدەي بولىنگەن (100-100). سونىڭ سالدارىنان قازاق ءتىلدى ۇمتىكەرلەردىڭ جيناعان بالل سانى ورىس ءتىلدى ۇمتىكەرلەردەن جوعارى بولعانىنا قاراماستان، گرانتقا وتە الماي وتىر.