ەلدە قانت باعاسى شارىقتاپ كەتتى
باعانى ىسىرىپ قويعان كۇننىڭ وزىندە دە قۇمشەكەردى كەز كەلگەن دۇكەننەن تابا المايسىز. ال اۋىل شارۋاشىلىعى ءمينيسترى تاپشىلىق بولمايدى دەپ سەندىردى. الايدا بۇل شىندىققا جاناسپايدى. سالدارىنان قانتتان ءونىم شىعاراتىن شاعىن وتاندىق كاسىپورىندار جىبىلىپ جاتىر. ماجىلىسمەن فاحريددين قاراتايەۆ ۆيتسە- پرەمەر رومان سكلياردىڭ اتىنا وسىنداي دەپۋتاتتىق ساۋال جولدادى. ماسەلەنىڭ شەشۋ جولدارىن دا ۇسىندى. ونىڭ ايتۋىنشا، تاريفتىك جەڭىلدىك بويىنشا ەلگە 350 مىڭ توننا قانت اكەلىنەدى. ىشكى قاجەتتىلىككە بايلانىستى بۇل كولەمدى 1,5 ەسەگە دەيىن ارتتىرۋ كەرەك. ءارى جەڭىلدىك مەرزىمىن جارتى جىلعا دەيىن ۇزارتۋ ماڭىزدى.
فاحريددين قاراتايەۆ، ق ر پارلامەنتى ءماجىلىسىنىڭ دەپۋتاتى:
- وڭىرلەردىڭ بارلىعىندا بۇگىنگى تاڭدا قانت تاپشىلىعى بايقالىپ وتىر. ءبىز مۇنى جوققا شىعارا المايمىز. سوندىقتان مىناۋ الدىمىزدا قويعان ماقسات. وسى ماسەلەنى ۇكىمەت قاتاڭ باقىلاۋعا الىپ، جۇمىس اتقارۋ كەرەك دەپ ەسەپتەيمىز.
www.24.kz
