پرەزيدەنت قازاقستاننىڭ تانىمال شاحماتشىلارىمەن كەزدەستى
اقورداعا پرەزيدەنتپەن كەزدەسۋگە الەم چەمپيوندارى مەن حالىقارالىق گروسسمەيستەرلەر - جانسايا ابدىمالىك، دينارا ءسادۋاقاسوۆا، ءبيبىسارا اساۋبايەۆا، گۇلىسحان ناقبايەۆا، حالىقارالىق شەبەر - مەرۋەرت كاماليدەنوۆا جانە قازاقستان شاحمات فەدەراتسياسىنىڭ پرەزيدەنتى عالىم قۇسايىنوۆ پەن ۆيتسە- پرەزيدەنت دارمەن ءسادۋاقاسوۆ شاقىرىلدى.
مەملەكەت باسشىسى تانىمال شاحماتشى قىزدارعا ءىلتيپات بىلدىرە وتىرىپ، بۇل ويىنعا ەرەكشە ءمان بەرەتىنىن اتاپ ءوتتى. سونداي- اق قازاقستاننىڭ ايەلدەر قۇراماسى الداعى ۋاقىتتا ءۇندىستاندا وتەتىن دۇنيەجۇزىلىك شاحمات وليمپياداسىندا تابىستى ونەر كورسەتەتىنىنە سەنىم ءبىلدىردى. پرەزيدەنت مەكتەپتى «التىن بەلگىمەن» بىتىرگەن ءبيبىسارا اساۋبايەۆاعا تابىس تىلەپ، گۇلىسحان ناقبايەۆانى وتكەن تۋعان كۇنىمەن قۇتتىقتادى.
اڭگىمەلەسۋ جانە پىكىر الماسۋ فورماتىندا وتكەن كەزدەسۋدە ۇلتتىق قۇراما كوشباسشىلارى - دينارا ءسادۋاقاسوۆا، جانسايا ابدىمالىك، ءبيبىسارا اساۋبايەۆا جانە قازاقستان شاحمات فەدەراتسياسىنىڭ باسشىلىعى ءسوز سويلەدى.
قاسىم- جومارت توقايەۆ كەزدەسۋدە ەلىمىزدە شاحمات سپورتىن دامىتۋ، ونىڭ ىشىندە مەملەكەت تاراپىنان جۇيەلى كومەك كورسەتۋ، قاجەتتى ينفراقۇرىلىممەن قامتاماسىز ەتۋ جانە شاحماتتى جەكە سپورت ءتۇرى رەتىندە ناسيحاتتاۋ جونىندەگى قاتىسۋشىلاردىڭ ۇسىنىستارىن تىڭدادى.
پرەزيدەنت مەكتەپ باعدارلاماسىنا شاحماتتى فاكۋلتاتيۆتىك ءپان رەتىندە قوسۋ، الماتىدا 1500 بالاعا ارنالعان شاحمات پەن اقپاراتتىق تەحنولوگيالاردى تەرەڭدەتىپ وقىتاتىن مەكتەپ- ينتەرنات سالۋ جونىندەگى ۇسىنىستى قولدادى. بۇدان بولەك، مەملەكەت باسشىسى كاسىپكەرلەر تاراپىنان شاحمات سپورتىن دامىتۋعا قولداۋ كورسەتۋدىڭ ماڭىزدى ەكەنىنە باسا ءمان بەردى. كەزدەسۋ سوڭىندا قاسىم- جومارت توقايەۆ شاحمات سالاسىن دامىتۋعا بۇدان بىلاي دا قولداۋ كورسەتەتىنىن اتاپ ءوتىپ، جاس سپورتشىلارعا حالىقارالىق ارەنادا جاڭا تابىس تىلەدى.
