دانيار ەلەۋسىنوۆتىڭ چەمپيوندىق جەكپە-جەگى كەيىنگە قالدىرىلدى

نۇر-سۇلتان. قازاقپارات - قازاقستاندىق بوكسشى دانيار ەلەۋسىنوۆ (12-0، 8 ك و) پەن ۋكرايندىق يۆان گولۋبتىڭ (20-1، 15 ك و) كەزدەسۋى بەلگىسىز مەرزىمگە اۋىستىرىلدى، دەپ حابارلايدى قازاقپارات Sports.kz سايتىنا سىلتەمە جاساپ.

ەلەۋسىنوۆ - گولۋب جەكپە-جەگى 25-ماۋسىمدا ا ق ش-تا وتەدى دەپ جوسپارلانعان ەدى. قازاقستاندىققا تيەسىلى IBO تۇجىرىمى بويىنشا جارتىلاي ورتا سالماقتاعى الەم چەمپيونى تيتۋلى ساراپقا سالىنعان. ۇيىمداستىرۋشىلار ايقاستىڭ قاشان وتەتىنىن ازىرگە ايتپادى.

دانيار ەلەۋسىنوۆ IBO بەلبەۋىن جەلتوقساندا ارگەنتينالىق بوكسشى حۋان ەرنان لەالدى (15-3، 4 ك و) تورەشىلەردىڭ ءبىراۋىزدان شەشىمىمەن جەڭىپ العان ەدى. سودان بەرى ەلەۋسىنوۆ رينگكە شىقپادى.