پەتروپاۆلدىق ەگىز بالا ازيا چەمپيوناتىندا گرەك- ريم كۇرەسىنەن التىننان القا تاقتى
بۇل كۇندەرى قىرعىزستاننىڭ بىشكەك قالاسىندا كادەتتەر اراسىندا (U17) جانە 23 جاسقا دەيىنگى (U23) جاستار اراسىندا گرەك- ريم، ايەلدەر جانە ەركىن كۇرەستەن ازيا چەمپيوناتى ءوتىپ جاتىر. بايراقتى دوداعا 21 ەلدىڭ سپورتشىلارى قاتىسۋدا. وسى جارىستا سولتۇستىك قازاقستان وبلىسىنىڭ ەكى سپورتشىسى گرەك- ريم كۇرەسىنەن چەمپيون اتاندى.
راۋان مەن ناريمان بەكىموۆتەر - ەگىزدەر. ازيا چەمپيوناتىندا 51 كەلى سالماقتا كۇرەسكەن راۋان بەكىموۆ اقتىق ويىندا قىرعىز سپورتشىسىمەن كەزدەسىپ، 8:0 ەسەبىمەن تازا جەڭىسكە جەتتى. ال ناريمان بەكىموۆ وزبەك سپورتشىسىن 8:2 ەسەبىمەن جەڭدى. وسىلايشا ەكەۋى دە سپورت شەبەرىنىڭ نورماتيۆىن ورىندادى. اعايىندىلار پەتروپاۆلداعى وبلىستىق وليمپيادا رەزەرۆىنىڭ مامانداندىرىلعان مەكتەپ- ينتەرنات- كوللەدجىندە وقيدى. بيىل 11 سىنىپقا كوشتى.
«راۋان مەن ناريمان بىزگە 7 سىنىپتا كەلدى. ولار پەتروپاۆلدا تۋعان. ەكەۋىنەن زور ءۇمىت كۇتەمىز. اياق الىستارى جامان ەمەس. تەك بيىل راۋان فرانسيادا وتكەن بۇكىل الەمدىك جازعى گيمنازيادادا كۇمىس جۇلدەنى ەنشىلەدى. ناريمان وسىنىڭ الدىندا عانا تۇركيانىڭ انتاليا قالاسىندا وتكەن حالىقارالىق تۋرنيردە 2 ورىن الدى. ول قازاقستان قۇراماسىنىڭ ساپىندا ونەر كورسەتكەن ەدى»، - دەيدى وقۋ ورداسىنىڭ گرەك- ريم ءبولىمىنىڭ ادىسكەرى گۇلميرا شايمەردەنوۆا.
ازيا چەمپيوندارىن جارىسقا دايىنداپ اپارعان جاتتىقتىرۋشى سەرالى قۇسايىنوۆتىڭ ايتۋىنشا، بالالار وزدەرىنە ارتىلعان سەنىمدى اقتاي ءبىلدى.
«ەكەۋى دە مىنەزدى سپورتشى، بوز كىلەمدە سوڭىنا دەيىن كۇرەسەدى. وسى چەمپيوناتقا ءبىز تەك جەڭىسپەن ورالامىز دەپ ماقسات قويىپ باردى. جالپى سپورتقا 12 جاستا كەلگەن. ءتورت جىلدىڭ ىشىندەگى ناتيجەلەرى جامان ەمەس»، - دەيدى سەرالى قۇسايىنوۆ.
ناريمان مەن راۋان بەكىموۆتەر گرەك- ريم كۇرەسىنەن الەم چەمپيوناتىنا جولداما الدى. كادەتتەر اراسىنداعى جارىس 25-شىلدە كۇنى يتاليادا باستالادى.
