مينيسترلىك «ارت سپورتقا» قاتىستى كەيبىر ۇيىرمەلەردى جازالاۋدى ۇسىندى

نۇر- سۇلتان. قازاقپارات - بۇگىن ەلوردادا «ارت سپورت» جوباسىنا قاتىستى قوعامدىق تىڭداۋ ءوتتى. ءىس- شاراعا مادەنيەت جانە سپورت مينيسترلىگىنىڭ، «اتامەكەن» ۇ ك پ- نىڭ، قوعامدىق بىرلەستىكتەردىڭ وكىلدەرى، اتا- انالار قاتىستى، دەپ حابارلايدى قازاقپارات ءتىلشىسى.

«بۇگىندە زاڭدامادا وزدەرىنىڭ مىندەتتەمەلەرىن ءتيىستى دەڭگەيدە ورىندامايتىن سپورتتىق جانە شىعارماشىلىق تاپسىرىستار بويىنشا قىزمەتتەردى جەتكىزۋشىلەردىڭ جاۋاپكەرشىلىگى كوزدەلمەگەن. وسى ورايدا بالالار مەن جاسوسپىرىمدەرگە ارنالعان سپورتتىق سەكسيالار مەن ۇيىرمەلەردە مەملەكەتتىك سپورت جانە شىعارماشىلىق تاپسىرىستار تالابىنىڭ ساقتالۋىنا باقىلاۋ جۇرگىزۋ قۇزىرەتىن جەرگىلىكتى اتقارۋشى ورگاندارعا جۇكتەۋ ۇسىنىلادى»، - دەدى ءىس- شارا بارىسىندا ق ر مادەنيەت جانە سپورت مينيسترلىگى مادەنيەت كوميتەتى ءتوراعاسىنىڭ ورىنباسارى كۇمىس سەيىتوۆا.

ونىڭ اتاپ وتۋىنشە، 2020 -جىلى قولدانىستاعى زاڭعا جان باسىنا قارجىلاندىرۋعا قاتىستى تۇزەتۋلەر ەنگىزىلدى. 2021 -جىلى زاڭ كۇشىنە ەنىپ، مامىر ايىنان باستاپ جان باسىنا قارجىلاندىرۋ جۇزەگە اسا باستادى.

«ءبىراق بۇگىنگە دەيىن اتالعان قىزمەتتى كورسەتۋگە قاتىستى سۇراقتار تۋىنداپ كەلەدى. سوندىقتان مەملەكەتتىك سپورتتىق جانە شىعارماشىلىق تاپسىرىستى ورىنداۋعا قاتىساتىن جەكە كاسىپكەرلىك سۋبەكتىلەرى زاڭ بۇزۋشىلىق ءۇشىن اكىمشىلىك جاۋاپكەرشىلىك بەلگىلەۋ ۇسىنىلىپ وتىر»، - دەدى ول.

كۇمىس سەيىتوۆانىڭ ايتۋىنشا، زاڭ بۇزۋشىلىق ءبىرىنشى رەت تىركەلگەندە ەسكەرتۋ تۇرىندەگى اكىمشىلىك جازا بەلگىلەۋ قاجەت. ال ودان كەيىن قايتالانعان جاعدايدا جەكە تۇلعالارعا 20 ايلىق ەسەپتىك كورسەتكىش (61260 تەڭگە) كولەمىندە ايىپپۇل سالىنادى. شاعىن كاسىپكەرلىك سۋبەكتىلەرىنە 30 ا ە ك (91890 تەڭگە)، ورتا كاسىپكەرلىك سۋبەكتىلەرىنە 50 ا ە ك (153150 تەڭگە)، ءىرى كاسىپكەرلىك سۋبەكتىلەرىنە 100 ا ە ك (306300 تەڭگە) مولشەرىندە ايىپپۇل سالۋ كوزدەلەدى.

«مەملەكەتتىك سپورت جانە شىعارماشىلىق تاپسىرىستاردى ءتيىستى دەڭگەيدە ورىنداماعانى ءۇشىن اكىمشىلىك جاۋاپكەرشىلىك ەنگىزۋ تاراپتارعا وڭ اسەرىن تيگىزەدى»، - دەدى مادەنيەت جانە سپورت مينيسترلىگىنىڭ وكىلى.

اۆتور: مارلان جيەمباي