قاڭتار وقيعاسى ەلدەگى احۋالدى مۇلدە وزگەرتتى - قايرات ءمامي

None
None
نۇر- سۇلتان. قازاقپارات - كونستيتۋتسيالىق كەڭەستىڭ ءتوراعاسى قايرات ءمامي پارلامەنتتىڭ بىرلەسكەن وتىرىسىندا كونستيتۋتسيالىق رەفورمانىڭ قاجەتىلىگى تۋرالى پايىمىن ايتتى، دەپ حابارلايدى قازاقپارات ءتىلشىسى.

«قاڭتار وقيعاسى ەلىمىزدەگى احۋالدى مۇلدە وزگەرتتى. بولاشاق تاعدىرىمىزدى ايقىندايتىن جاڭا قۇندىلىقتاردىڭ قاجەتتىگى تۋىندادى. پرەزيدەنت قاسىم- جومارت كەمەل ۇلى توقايەۆ وسى ۇردىستەر مەن ىقتيمال قاتەرلەردى ەسكەرە وتىرىپ، بيىلعى جولداۋىندا ازاماتتىق ورتا مەن ساياسي جۇيەنى وزگەرتۋگە باعىتتالعان ءبىرقاتار ماڭىزدى شارانىڭ جاڭا پاكەتىن ۇسىندى. مەملەكەت باسشىسىنىڭ جولداۋدا ايتىلعان باستامالارى بۇكىل سالانى دەموكراتيالاندىرۋدى تالاپ ەتتى. قويىلعان ماقساتتار كونستيتۋتسياناليزمدى ودان ءارى نىعايتۋعا باعىتتالدى»، - دەدى كونستيتۋتسيالىق كەڭەس ءتوراعاسى.

ايتۋىنشا، وسى اتالعان فاكتوردىڭ مىندەتتەرگە جەتۋى ءۇشىن كونستيتۋتسيالىق رەفورما كەرەك بولعان.

«زامان مەن قوعام وزگەرىپ جاتقان ۋاقىتتا نەگىزگى زاڭىمىز دا جاڭارتۋدى كەرەك ەتتى. ياعني قولدانىستاعى كونستيتۋتسيانى وزگەرتۋ قاجەتتىلىگى تۋىندادى»، - دەدى قايرات ءمامي.

كونستيتۋتسيالىق كەڭەستىڭ ءتوراعاسى قايرات ءمامي پارلامەنتتىڭ بىرلەسكەن وتىرىسىندا 1995 -جىلعى كونستيتۋتسيانىڭ تاريحي ءرولى تۋرالى ايتتى.

«كەلىسىپ پىشكەن تون كەلتە بولماس» دەگەندەي، ايدىڭ باسىندا وتكەن رەسپۋبليكالىق رەفەرەندۋمنىڭ ناتيجەسىندە ماقۇلدانعان كونستيتۋتسيالىق تۇزەتۋلەر قوعام مەن مەلەكەتتى ودان ءارى جاڭعىرتۋدىڭ قۇقىقتىق نەگىزدەرىن قالادى. الدىمىزدا تۇرعان باسىم مىندەت - جاڭارتىلعان كونستيتۋتسيانىڭ ءمانىن تەرەڭ ۇعىنۋ، بۇكىل زاڭنامانى وعان سايكەستەندىرۋ»، - دەدى كونستيتۋتسيالىق كەڭەس ءتوراعاسى.

سونداي- اق ول اتا زاڭنىڭ بۇعان دەيىن قولدانىستا بولىپ كەلگەن نۇسقاسى دا ەلدىڭ ىرگەسىن بەكىتۋدە ماڭىزدى ءرول اتقارعانىن ەسكە سالدى.

«1995 -جىلدىڭ 30- تامىزىندا جالپىحالىقتىق رەفەرەندۋمدا قابىلدانعان كونستيتۋتسيا مەملەكەت تاۋەلسىزدىگىن ۇستاپ تۇرۋ ءۇشىن ۇلكەن ءرول اتقاردى. اتا زاڭدى مۇلتىكسىز ورىنداۋ، ونىڭ پرينتسيپتەرىن بۇلجىتپاي ساقتاۋ - ەلدىڭ ۇدەمەلى دامۋىنىڭ العىشارتى. كونستيتۋتسيا - ازاماتتىعىمىزدىڭ ايشىقتىعىنىڭ ايعاعى. ال ءبىزدىڭ قىزمەتىمىز - اتالعان كيەلى قۇجاتتىڭ مىزعىماستىعىن قامتاماسىز ەتۋگە باعىتتالعان»، - دەدى قايرات ءمامي.

ايتا كەتەيىك، پارلامەنتتىڭ بۇگىنگى بىرلەسكەن وتىرىسىنا سەنات ءتوراعاسى ماۋلەن اشىمبايەۆ، ءماجىلىس ءتوراعاسى ەرلان قوشانوۆ، ۇكىمەت باسشىسى ءاليحان سمايىلوۆ، رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعاسى ناتاليا گودۋنوۆا، ۇكىمەت مۇشەلەرى قاتىسىپ جاتىر.

اۆتور: ەسىمجان ناقتىباي

سوڭعى جاڭالىقتار