ق ر پرەزيدەنتى ۋكراينانىڭ ەۋروپالىق وداققا مۇشە بولۋ مۇمكىندىگىنە پىكىر ءبىلدىردى

None
None
سانكت- پەتەربۋرگ. قازاقپارات - ۋكراينانىڭ ەۋروپالىق وداق قۇرامىنا قوسىلۋى ەۋرازيالىق ەكونوميكالىق وداققا قانداي دا ءبىر نۇقسان كەلتىرمەيدى.

بۇل تۋرالى پەتەربۋرگ حالىقارالىق ەكونوميكالىق فورۋمىنىڭ پلەنارلىق وتىرىسىندا قازاقستان پرەزيدەنتى قاسىم- جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.

«ۋكراينانىڭ ەۋروپالىق وداققا قوسىلۋ مۇمكىندىگى ەۋرازيالىق ەكونوميكالىق وداققا قانداي دا ءبىر نۇقسان كەلتىرمەيدى دەپ سانايمىن. ۋكراينانىڭ ەۋروپالىق وداققا قوسىلۋى قالاي جۇرگىزىلەتىنى باسقا ماسەلە، سەبەبى وندا وتە قاتاڭ تالاپتار بار. ال ۋكراينانىڭ ەكونوميكاسى بولسا كۇردەلى جاعدايدا تۇر. وسى ورايدا ولاردا ۋكراينا ءۇشىن ارنايى جەڭىلدەتىلگەن باعدارلاما بولۋى ىقتيمال»، - دەدى قاسىم- جومارت توقايەۆ فورۋمدا قويىلعان سۇراققا جاۋاپ بەرە وتىرىپ. بۇل تۇرعىدا مەملەكەت باسشىسى اتالعان ەلدىڭ قازىرگى جاعدايى قاسىرەتكە تولى ەكەنىن ايتتى. سونىمەن قاتار قاسىم- جومارت توقايەۆ كەڭەستىك كەزەڭدە ۋكراينا كەڭەس وداعىنىڭ استىق قويماسى ءارى ونەركاسىپتىك دامىعان رەسپۋبليكا بولعانىن ەسكە سالدى.

«ەۋروپالىق وداق تۋرالى ماسەلەگە توقتالسام، ۋكراينانىڭ قوسىلۋىنا قولداۋ كورسەتۋ تۋرالى شەشىم قابىلداندى. بۇل ءوز كەزەگىندە ەكونوميكالىق وداق. ەگەر ءدال وسى ەكونوميكالىق ۇيىمدا ۋكراينانى ءوز قاتارلارىندا كورگىلەرى كەلسە، وندا مۇنى اقيقات دەپ قابىلداۋ كەرەك»، - دەدى پرەزيدەنت.

سوڭعى جاڭالىقتار