ق ر پرەزيدەنتى: شەكتەن تىس ينفلياتسيامەن، ازىق-تۇلىك تاپشىلىعىمەن كۇرەس - ءبىزدىڭ ورتاق مىندەتىمىز

None
None
سانكت-پەتەربۋرگ. قازاقپارات - مەملەكەت باسشىسى قاسىم-جومارت توقايەۆ سانكت-پەتەربۋرگتە ءوتىپ جاتقان XXV حالىقارالىق ەكونوميكالىق فورۋمدا حالىقتى ساپالى جانە قاۋىپسىز تاماق ونىمدەرىمەن قامتۋ ماسەلەسىن كوتەردى، دەپ حابارلايدى قازاقپارات ءتىلشىسى.

«حالىقتى ساپالى جانە قاۋىپسىز تاماق ونىمدەرىمەن قامتۋ ىشكى تۇراقتىلىقتى ساقتاۋدىڭ ءبىرىنشى كەزەكتەگى مىندەتى جانە فاكتورى بولىپ قالا بەرەدى. سەنىمدى ازىق-تۇلىك جۇيەسىن قۇرۋ ءۇشىن يننوۆاتسيالىق شەشىمدەر مەن وزىق تەحنولوگيالاردى ەنگىزىپ، ازىق-تۇلىك شىعىندارىن ازايتۋ ماڭىزدى»، - دەدى قازاقستان پرەزيدەنتى.

ق. توقايەۆ ازىق-تۇلىك قاۋىپسىزدىگىن قامتاماسىز ەتۋ تاسىلدەرىن بارلىق قاتىسۋشى مەملەكەتتەردىڭ قاجەتتىلىكتەرى مەن مۇددەلەرىن ەسكەرە وتىرىپ، ە ا ە و- نى قوسا العاندا، ۇلتتىق دەڭگەيلەردە دە، وڭىرلىك بىرلەستىكتەر اياسىندا دا ازىرلەۋ كەرەگىن ايتتى.

«ىنتىماقتى جۇمىس بولماسا، وسىنداي وتە ماڭىزدى سالادا كوزدەلگەن ماقساتتارعا جەتۋ قيىن. باسقاشا ايتقاندا، شەكتەن تىس ينفلياتسيامەن، ازىق-تۇلىك تاپشىلىعىمەن كۇرەس - ءبىزدىڭ ورتاق مىندەتىمىز. قازىر جانە تاياۋ ۋاقىتتا بىزگە بۇدان ماڭىزدى ماقسات جوق، ويتكەنى ول ءبىزدىڭ ازاماتتارىمىزدىڭ ءال-اۋقاتىنا تىكەلەي قاتىستى. ءبىزدىڭ مەملەكەتتەرىمىزدىڭ الەۋەتى نارىقتارىمىزدى قاجەتتى ازىق-تۇلىك تاۋارلارىمەن تۇراقتى جانە تولىق قامتاماسىز ەتۋگە مۇمكىندىك بەرەدى»، - دەدى قاسىم-جومارت توقايەۆ.

ايتا كەتەيىك، قاسىم-جومارت توقايەۆ پەتەربۋرگتەگى حالىقارالىق ەكونوميكالىق فورۋمعا قاتىسىپ جاتىر.

سەسسيادا قازاقستان پرەزيدەنتى قاسىم-جومارت توقايەۆ، سونداي-اق بەينەكونفەرەنتسيا بايلانىسى ارقىلى ەگيپەت پرەزيدەنتى ابدۋل-فاتتاح اس-سيسي ءسوز سويلەيدى. فورۋم قاتىسۋشىلارىنا قىتاي حالىق رەسپۋبليكاسىنىڭ ءتوراعاسى شي جينپيڭ بەينەۇندەۋ جولدايدى.

سپيكەرلەر ءسوز سويلەپ بولعان سوڭ سۇراق-جاۋاپ فورماتىندا اشىق پىكىرتالاس وتەدى.


سوڭعى جاڭالىقتار