قاسىم- جومارت توقايەۆ تاتارستان پرەزيدەنتى رۋستام ميننيحانوۆپەن كەزدەستى
ەكونوميكانىڭ ماڭىزدى سەكتورلارىنداعى بىرلەسكەن جوبالاردى قازاقستان اۋماعىندا جۇزەگە اسىرۋعا، ەلىمىزدىڭ زاۋىتتارىن رەسەي فەدەراتسياسىنىڭ ءوندىرىس جۇيەسىمەن قاتار دامىتۋعا باسا ءمان بەرىلدى، دەپ حابارلايدى قازاقپارات.
پرەزيدەنت باسپا ءسوز قىزمەتىنىڭ مالىمەتىنشە، جيىندا «كاماز» جانە «تات نەفت» كومپانيالارىمەن بىرلەسكەن جوبالاردى جۇزەگە اسىرۋ بارىسى قارالعان. كەزدەسۋگە بۇل كومپانيالاردىڭ دا باسشىلارى قاتىستى. قاسىم- جومارت توقايەۆ رۋستام ميننيحانوۆقا ءىلتيپات بىلدىرە وتىرىپ، ءوزىنىڭ تاتارستانعا بارعان ساپارىن ايرىقشا ىقىلاسپەن ەسكە الدى. ونىڭ ناتيجەسى ىنتىماقتاستىقتى ودان ءارى نىعايتۋعا تىڭ سەرپىن بەردى.
- ۋاعدالاستىقتارىمىزدىڭ قالاي جۇزەگە اسىپ، كوزدەگەن ماقساتقا قالاي قول جەتكىزىپ جاتقانىمىزدى كورىپ وتىرمىن. ءبارى دە باقىلاۋدا دەپ ايتۋعا بولادى، - دەدى قازاقستان پرەزيدەنتى.
قاسىم- جومارت توقايەۆ قازاقستاننىڭ رەسەيمەن كوپجاقتى قاتىناسىندا ماڭىزدى ورىن الاتىن قازاق- تاتار بايلانىسىنىڭ قارقىندى دامىپ كەلە جاتقانىن اتاپ ءوتتى. 2021 -جىلدىڭ قورىتىندىسى بويىنشا رەسپۋبليكامەن اراداعى تاۋار اينالىمى 423 ميلليون دوللار بولدى. بيىلعى ءتورت ايدىڭ ىشىندە 143 ميلليون دوللارعا جەتتى. ماشينا جاساۋ سالاسىنداعى ءىرى جوبالار تابىستى جۇزەگە اسىپ جاتىر. قازاقستان مەن رەسەيدىڭ ءوڭىرارالىق فورۋمى ىنتىماقتاستىقتى كەڭەيتۋگە جاقسى مۇمكىندىك بەرەدى.
ءوز كەزەگىندە رۋستام ميننيحانوۆ پەتەربۋرگ حالىقارالىق ەكونوميكالىق فورۋم اياسىندا كەزدەسۋگە مۇمكىندىك تۋعىزعانىنا ريزاشىلىعىن ءبىلدىرىپ، تاتار كومپانيالارىنىڭ قازاقستاندىق سەرىكتەستەرىمەن ىقپالداستىق ورناتۋىنا قولداۋ كورسەتىپ جاتقانى ءۇشىن قاسىم- جومارت توقايەۆقا العىس ايتتى.
- قازاقستان كومپانيالارىنىڭ رەسەي نارىعىنا تاتارستان ارقىلى كىرۋگە مۇمكىندىك الۋىنا پايدامىزدى تيگىزگىمىز كەلەدى. تولىققاندى قولداۋ كورسەتىپ، ىقپال ەتۋگە دايىنبىز، - دەدى تاتارستان پرەزيدەنتى.
