ءار ادام جەكە باسقا ەمەس، ۇلتتىق مۇددەگە قىزمەت ەتۋگە تالپىنۋى كەرەك - ەرلان قوشانوۆ

None
ۇلىتاۋ. قازاقپارات - وزىق زاماناۋي ۇردىستەردى ۇلگى تۇتقان جاڭا ساياسي مادەنيەت قالىپتاستىرۋ - جاڭا قازاقستاندى قۇرۋدىڭ العىشارتى.

بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

«جاڭا قازاقستانداعى قوعامنىڭ بىرىگۋى مەن جۇمىلۋىنىڭ ءبىر ارناعا توعىسۋىنىڭ اسا قاجەت ەكەنى داۋسىز. ول - ۋاقىت تالابى! ءبىراق، مارتەبەسى بيىك، ماڭىزى تەرەڭ بۇل ءىس قانداي نەگىزدە جۇزەگە اسادى؟ قوعامنىڭ جاڭا رۋحاني بولمىسى مەن ەتيكالىق ۇستانىمى قانداي بولماق؟ بۇگىنگى تاڭدا بۇل سۇراقتاردىڭ ماڭىزدىلىعىن جوققا شىعارۋعا بولماس! ويتكەنى، قازاقستاندىقتاردى جوعارى ۇلتتىق قۇندىلىقتار مەن دەموكراتيالىق ساياسي ءداستۇر نەگىزىندە عانا توپتاستىرۋعا بولادى. رەفەرەندۋمنىڭ شىڭى مەن شىندىعى بىزگە كەم دەگەندە ءۇش ناقتى مىندەت پەن ماقسات قويىپ وتىر»، - دەدى ە. قوشانوۆ.

وسى ورايدا ول ءبىرىنشى كەزەكتە ءتارتىپ پەن زاڭدىلىقتىڭ ماڭىزدىلىعىن اتادى. ادىلەتتى قازاقستان ورناتۋدىڭ باستى شارتى - زاڭ ۇستەمدىگىن ورنىقتىرۋ، قوعامدا قۇقىقتىق مادەنيەت قالىپتاستىرۋ.

«بۇل تۇرعىدان دا ەلىمىزدە كوپتەگەن ماسەلەلەر قوردالانىپ قالدى. باۋىرجان مومىش ۇلىنىڭ «تارتىپسىز ەل بولمايدى، تارتىپكە باعىنعان قۇل بولمايدى» دەگەن ءسوزىن وسيەت ەتىپ ۇستانساق ارتىق بولماس. قازىرگى زاڭناما بويىنشا اركىمنىڭ زاڭدى تۇردە ميتينگ نەمەسە بەيبىت شەرۋ وتكىزۋگە حاقىسى بار. ميتينگ دەگەن كۇندەلىكتى ءومىردىڭ كورىنىسىنە اينالدى. الايدا كەيبىر ازاماتتار ءوزىنىڭ پىكىرىن ءبىلدىرۋ كەزىندە زاڭ اياسىنان اسىپ كەتەتىن ءىس-ارەكەتتەرگە بارادى»، - دەدى ءماجىلىس ءتوراعاسى.

ە. قوشانوۆ ەكىنشى مىندەت رەتىندە جاڭا قوعامدىق سانانى اتاپ ءوتتى.

«جاڭا قازاقستاندا جاڭا قوعامدىق وي-سانا قالىپتاستىرۋىمىز كەرەك.

بۇل بارشامىزدى مەزى قىلعان جاساندىلىقتان، بيۋروكراتيزمنەن، جالعاندىقتان، پافوستان جيرەنىپ، ادىلەت پەن ادالدىق جاعىنا ءبىرجولاتا شىعۋىمىزدى تالاپ ەتەدى. پارلامەنتتىڭ دە، پارتيالاردىڭ دا باستى مىندەتى - ەلدە بولىپ جاتقان وڭ وزگەرىستەردى حالىققا جەتكىزۋ، جاس ۇرپاقتىڭ بويىنا ءسىڭىرۋ! ءبىز پرەزيدەنت كورسەتكەن ساياسي مەجەگە، رەفورمالاردىڭ قارقىنىنا ىلەسىپ، جاڭا جاعدايدا جۇمىس ىستەۋگە بەيىمدەلۋىمىز قاجەت. وسى ورايدا «كۇشتى پرەزيدەنت - ىقپالدى پارلامەنت - ەسەپ بەرەتىن ۇكىمەت» قاعيداسى «جاۋاپتى قوعام مەن جاۋاپتى ازامات» فورمۋلاسىمەن ۇندەسىپ تۇر»، - دەدى ول.

«ءۇشىنشى كەزەكتە - جاڭا ساياسي مادەنيەت. وزىق زاماناۋي ۇردىستەردى ۇلگى تۇتقان جاڭا ساياسي مادەنيەت قالىپتاستىرۋ - جاڭا قازاقستاندى قۇرۋدىڭ العىشارتى. ەلىمىزدە كونسترۋكتيۆتى مادەنيەت، پىكىرتالاس مادەنيەتىن قالىپتاستىرۋعا ءتيىسپىز. ءار ادام جەكە باسقا ەمەس، ۇلتتىق مۇددەگە قىزمەت ەتۋگە تالپىنۋى كەرەك. قۇرىلتاي وسى ساياسي مادەنيەتتى جاڭا دەڭگەيگە كوتەرەدى دەپ بىلەمىز»، - دەدى ءماجىلىس ءتوراعاسى.

سوڭعى جاڭالىقتار