پرەزيدەنت ەل تاعدىرى قىل ۇستىندە تۇرعان سىن ساعاتتا قيىن شەشىمدەر قابىلدادى - ەرلان قوشانوۆ

ۇلىتاۋ. قازاقپارات - مەملەكەت باسشىسىنىڭ شەشىمدەرى ەلىمىزدىڭ تاۋەلسىزدىگى مەن مەملەكەتتىگىن ساقتاپ قالدى.

بۇل تۋرالى ۇلىتاۋ وبلىسىندا ءوتىپ جاتقان ۇلتتىق قۇرىلتايدىڭ وتىرىسىندا ءماجىلىس ءتوراعاسى ەرلان قوشانوۆ ايتتى، دەپ حابارلايدى قازاقپارات ءتىلشىسى.

«بۇگىنگى ۇلتتىق قۇرىلتايعا ءبىز اتا-بابالارىمىزدىڭ ارتىندا قالدىرعان - تاتۋلىق پەن بىرلىكتىڭ بايراعىن كوتەرىپ، ادال اماناتىن ارقالاپ كەلىپ وتىرمىز. بارشا كوپۇلتتى وتانداستارىمىزدىڭ وسى يگى جولدا مەملەكەت باسشىسى قاسىم-جومارت كەمەل ۇلى توقايەۆتىڭ «بابالار اماناتىنا ادال بولىپ، ونى ۇرپاققا تابىستاۋ - مەن ءۇشىن كيەلى پارىز» دەگەن ارداقتى سوزىنەن قۋات العانى اقيقات! وعان وسىدان ەكى اپتا بۇرىن اتا زاڭىمىزعا ەنگىزىلگەن وزگەرىستەرگە ارنالىپ وتكەن رەسپۋبليكالىق رەفەرەندۋمنىڭ وڭ ناتيجەلەرى ايقىن دالەل. قازاق ەلى ءوز تاريحىنىڭ جاڭا بەلەسىنە اياق باستى»، - دەدى ە. قوشانوۆ.

ونىڭ پايىمىنشا، تاريحي رەفەرەندۋم بىرنەشە شىندىقتىڭ باسىن اشىپ بەردى.

«ءبىرىنشى شىندىق - بىرلىك. قازاق حالقىنىڭ، قازاقستان جۇرتىنىڭ مەملەكەتتىك، ۇلتتىق باعىتتا ۇيىسا بىلەتىنىن، سىن ساعاتتا ساياسي امبيتسياسىن ىسىرىپ، اسقان مۇراتشىلدىق پەن اۋىزبىرشىلىك ۇلگىسىن تانىتىپ، ونى ەلگە دە، الەمگە دە پاش ەتتى. حالقىمىز مەملەكەت باسشىسى قاسىم-جومارت كەمەل ۇلى توقايەۆتىڭ ەكىنشى رەسپۋبليكا قۇرۋدى كوزدەگەن ستراتەگيالىق باعىتىن، تەرەڭ رەفورمالارىن، ەلدى تۇبەگەيلى وزگەرتۋگە باعىتتالعان تاريحي تالپىنىسىن باسىم داۋىسپەن قولدادى. ەلىمىز رەفورمالاردىڭ ودان ءارى جالعاسۋىن، جالعاسا بەرۋىن قالاپ وتىر. ەل-جۇرتتى ارالاپ، مىڭداعان كەزدەسۋلەر وتكىزگەن كەزدە ءماجىلىس دەپۋتاتتارى، «اماناتتىڭ» وڭىردەگى وكىلدەرى وسىعان تولىق كوز جەتكىزدىك. تۇپتەپ كەلگەندە، قاسىرەتتى قاڭتار وقيعاسىنان كەيىن قازاقستاننىڭ بولاشاعىنا، قازاق قوعامىنىڭ بىرلىگىنە كۇمان كەلتىرگەندەر دە از بولعان جوق. الايدا تاريحي رەفەرەندۋم حالقىمىزدىڭ تۇتاستىق پەن اۋىزبىرشىلىككە، مەملەكەتشىلدىك مۇراتى مەن ءتاۋ ەتكەن تاۋەلسىزدىككە ادال ەكەنىن ايقىن كورسەتتى»، - دەدى ءماجىلىس ءتوراعاسى.

«وسى تۇستا، قاسىم-جومارت كەمەل ۇلى، مەن ءبىر نارسەنى ەرەكشە اتاپ وتكىم كەلەدى. ەل تاعدىرى قىل ۇستىندە تۇرعان سول سىن ساعاتتارىندا اسا اۋىر جاعدايدا قانداي قيىن شەشىمدەر قابىلداعانىڭىزدىڭ كۋاگەرى بولدىق. ول تۋرالى كەشەگى بەرگەن تەلە-سۇحباتىڭىزدا ءوزىڭىز دە ايتتىڭىز. سول شەشىمدەر ءبىزدىڭ تاۋەلسىزدىگىمىز بەن مەملەكەتتىگىمىزدى ساقتاپ قالعانى - اقيقات»، - دەدى ەرلان قوشانوۆ.

بۇدان بۇرىن حابارلانعانداي، بۇگىن ق ر پرەزيدەنتى قاسىم-جومارت توقايەۆتىڭ قاتىسۋىمەن ۇلتتىق قۇرىلتايدىڭ العاشقى وتىرىسى ءوتىپ جاتىر.

ايتا كەتەيىك، بۇگىن پرەزيدەنت جاڭادان قۇرىلعان ۇلىتاۋ وبلىسىنا جۇمىس ساپارىمەن كەلگەن بولاتىن.

كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.