ۇلتتىق قۇرىلتاي نە ءۇشىن قۇرىلدى
«ۇلتتىق قوعامدىق سەنىم كەڭەسى جۇمىسىن اياقتادى. دەگەنمەن، ونىڭ نەگىزگى مۇشەلەرى ۇلتتىق قۇرىلتاي قۇرامىنا كىردى. مەملەكەت باسشىسى جاڭا قۇرىلىم جايىندا العاش رەت ناۋرىزداعى جولداۋىندا مالىمدەگەن بولاتىن. ۇلتتىق قۇرىلتاي نە ءۇشىن قۇرىلدى؟ ۇلتتىق قۇرىلتاي قوعامنىڭ بىرىگۋىن نىعايتۋ جانە كەڭەيتۋگە يدەيالار مەن قادامدار ىزدەۋ ءارى ازىرلەۋ ءۇشىن ديالوگ پلاتفورماسىنا اينالۋدى ماقسات تۇتادى»، - دەپ جازدى مەملەكەتتىك كەڭەسشى Telegram پاراقشاسىندا.
سونىمەن قاتار ول ۇلتتىق قۇرىلتايدىڭ ۇلتتىق قوعامدىق كەڭەستەن قانداي ايىرماشىلىعى بار ەكەندىگىن دە ايتتى.
«ەگەر ۇلتتىق قوعامدىق سەنىم كەڭەسىندەگى پىكىرتالاس تاقىرىبى اعىمداعى الەۋمەتتىك- ەكونوميكالىق پروبلەمالار، ساياسي رەفورمالار ماسەلەسى بولسا، ال ۇلتتىق قۇرىلتايدا تالقىلاۋ تاقىرىبى جالپىۇلتتىق قۇندىلىقتار نەگىزىندە قوعام بىرىگۋىنىڭ ودان ارى دامي تۇسۋىنە قاتىستى ۇزاقمەرزىمدى سيپاتتاعى ماسەلەلەر بولادى»، - دەدى ەرلان قارين.
ەرلان قارين قۇرىلتاي قۇرامىنا كىرگەن تانىمال ءبىرقاتار تۇلعانىڭ ەسىمىن اتادى.
«بۇگىن مەملەكەت باسشىسى ۇلتتىق قۇرىلتاي قۇرۋ تۋرالى جارلىققا قول قويىپ، وندا ونىڭ ەرەجەسى مەن قۇرامى بەكىتىلدى. جاڭا قوعامدىق ينستيتۋتتىڭ مۇشەلەرى قاتارىندا مىناداي تانىمال تۇلعالار بار: تانىمال كومپوزيتور، جازۋشى، قازاقستاننىڭ ەڭبەك ەرى ءىليا جاقانوۆ؛ قازاقستاننىڭ حالىق جازۋشىسى، اقىن، قوعام قايراتكەرى مۇحتار شاحانوۆ؛ قازاقتىڭ تۇڭعىش عارىشكەرى، كەڭەس وداعىنىڭ باتىرى، حالىق قاھارمانى توقتار اۋباكىروۆ؛ تانىمال جۋرناليست ءارى قوعام قايراتكەرى سەيداحمەت قۇتتىقادام؛ كورنەكتى عالىم- ماتەماتيك، اكادەميك اسقار جۇمادىلدايەۆ؛ ءىرى ەكونوميست جانە قوعام قايراتكەرى جاقسىبەك كۇلەكەيەۆ؛ تانىمال مەملەكەت قايراتكەر، ساياساتكەر ءاليحان بايمەنوۆ؛ جۋرناليست، مەديا- مەنەدجەر، قوعام قايراتكەرى ەرمۇرات ءباپي؛ مەملەكەت جانە قوعام قايراتكەرى، پارلامەنتتىڭ بىرنەشە شاقىرىلىمىنىڭ دەپۋتاتى نۇرتاي سابيليانوۆ؛ الەم چەمپيونى، سەۋل وليمپياداسىنىڭ كۇمىس جۇلدەگەرى، قوعام قايراتكەرى داۋلەت تۇرلىحانوۆ؛ عالىم- بيوتەحنولوگ كۇنسۇلۋ زاكاريا؛ قوعام قايراتكەرى، ءدىنتانۋشى قايرات جولدىباي؛ تانىمال ءتىلشى- عالىم انار فازىلجانوۆا؛ ەكولوگ، ازاماتتىق بەلسەندى ازامات امىرتايەۆ. سونىمەن قاتار قازاقستانعا تانىمال وزگە دە تۇلعالار كىردى. ۇلتتىق قۇرىلتايدىڭ قۇرامىندا جالپى 117 قاتىسۋشى بار»، - دەپ جازدى مەملەكەتتىك كەڭەسشى پاراقشاسىندا.
وسى رەتتە ەرلان قارين ۇلتتىق قۇرىلتايدىڭ باستى ايىرماشىلىعى مەن ەرەكشەلىگى رەتىندە ونىڭ قۇرامىنا ءاربىر وڭىرلىك قوعامدىق كەڭەستەن ءبىر- ءبىر وكىل كىرگەندىگىن اتاپ ءوتتى.
«وسىلايشا، وسىناۋ ديالوگ الاڭى جەرگىلىكتى قوعامدىق كەڭەستەردىڭ بارلىق جۇيەسىن وزىنە تۇيىقتايدى. سونىمەن قاتار ۇلتتىق قۇرىلتايعا پارلامەنت دەپۋتاتتارى، ساياسي پارتيالاردىڭ، بيزنەستىڭ ءىرى سالالىق بىرلەستىكتەرىنىڭ، مەديتسينانىڭ، ءبىلىمنىڭ، عىلىمنىڭ، مادەنيەتتىڭ، سپورتتىڭ، ادام قۇقىعىن قورعاۋ جانە وزگە دە الەۋمەتتىك توپتاردىڭ وكىلدەرى كىردى. جۇمىسقا جاس كوشباسشىلار مەن بەلسەندىلەر دە شاقىرىلعان»، - دەدى ول.
اۆتور: مارلان جيەمباي
