ريم پاپاسى قىركۇيەكتە قازاقستاندا ورىس پراۆوسلاۆ شىركەۋىنىڭ باسشىسىمەن كەزدەسكىسى كەلەتىنىن ءبىلدىردى

نۇر-سۇلتان. قازاقپارات - ريم پاپاسى فرانتسيسك قىركۇيەكتە قازاقستاندا ماسكەۋ جانە بۇكىل رەسەي پاتريارحى كيريللمەن كەزدەسكىسى كەلەتىنىن ءبىلدىردى.

بۇل تۋرالى ول سەيسەنبىدە يسا قوعامىنىڭ ەۋروپالىق جۋرنالدارىنىڭ باسشىلارىنا بەرگەن سۇحباتىندا ايتتى.

سۇحبات ۇزىندىلەرى La Stampa گازەتىندە جاريالاندى، ال كەزدەسۋدى La Civilta Cattolica جۋرنالى ۇيىمداستىرعان.

بۇل تۋرالى قازاقپارات تاسس اقپارات اگەنتتىگىنە سىلتەمە جاساپ حابارلايدى.

«مەن ونىمەن 14- ماۋسىمدا يەرۋساليمدە كەزدەسىپ، ورتاق ىستەرىمىز تۋرالى سويلەسۋىم كەرەك ەدى»، - دەپ ەسكە سالدى پونتيفيك.

فرانتسيسك ۋكرايناداعى قاقتىعىسقا بايلانىستى ديالوگ دۇرىس تۇسىنىلمەي قالماۋى ءۇشىن كەزدەسۋدى كەيىنگە قالدىرۋ تۋرالى شەشىم قابىلدانعانىن ايتتى.

«مەن ونىمەن قىركۇيەكتە قازاقستاندا كەزدەسەتىنىمە ۇمىتتەنەمىن. سالەمدەسىپ، پاستور رەتىندە ازعانتاي اڭگىمەلەسەمىز دەگەن سەنىمدەمىن»، - دەدى فرانتسيسك.

ءساۋىر ايىندا ريم-كاتوليك شىركەۋىنىڭ باسشىسى 14-15- قىركۇيەكتە نۇر-سۇلتاندا وتەتىن الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىساتىنىن راستادى.

قازاقستان 2003-جىلى الەمدىك جانە ءداستۇرلى دىندەر كوشباسشىلارىنىڭ سەزىن شاقىرۋ تۋرالى باستاما كوتەردى، سودان بەرى فورۋم تۇراقتى ءىس-شاراعا اينالعان.

ۆاتيكاندا ريم پاپاسىنىڭ قازاقستانعا ساپارى تۋرالى ءالى رەسمي تۇردە جاريالانعان جوق.

شىلدە ايىنىڭ باسىنا جوسپارلانعان كونگو دەموكراتيالىق رەسپۋبليكاسى (ك د ر) مەن وڭتۇستىك سۋدانعا كەلەسى ساپارىن پونتيفيك تىزەسى اۋىرسىنۋىنا بايلانىستى كەيىنگە قالدىردى.