باعالاردىڭ جالپى ءوسۋىن تەجەۋ جۇمىسىن كۇشەيتۋ قاجەت - ۇكىمەت باسشىسى

نۇر-سۇلتان. قازاقپارات - مەملەكەتتىك ورگانداردىڭ ءبىرىنشى باسشىلارى مەن اكىمدەر ينفلياتسيانى تەجەۋ جۇمىسىن كۇشەيتۋى قاجەت.

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«5 ايدىڭ قورىتىندىسى بويىنشا جالپى ىشكى ءونىم 4،6 پايىزعا ءوستى. وعان نەگىزىنەن ناقتى سەكتوردىڭ قارقىندى دامۋى، ونىڭ ىشىندە وڭدەۋ ونەركاسىبى ايتارلىقتاي ۇلەس قوستى. ءوسىم تىركەلگەن نەگىزگى سالالار - ازىق- تۇلىك ونىمدەرى - 3، سۋسىن ءوندىرىسى - 18، جەڭىل ونەركاسىپ - 8، حيميا ونەركاسىبى - 11، رەزينا جانە پلاستماسسا بۇيىمدارىن شىعارۋ - 11 پايىزدان استى. سونداي-اق، مۇناي وڭدەۋ - 8، جيھاز جانە ماشينا جاساۋ ونىمدەرى - 10، فارماتسيەۆتيكا - 5 پايىزعا ءوستى»، - دەدى ۇكىمەت باسشىسى.

پرەمەر- ءمينيستردىڭ دەرەگىنشە، تاۋ- كەن ونەركاسىبىندەگى 4 پايىز ءوسىم تابيعي گاز، مۇناي، كومىر جانە مەتالل كەنىن ءوندىرۋ ەسەبىنەن قامتاماسىز ەتىلدى. قۇرىلىس سالاسى دا 9 پايىزعا جۋىق تۇراقتى ءوسىم كورسەتىپ وتىر. قۇرىلىس ماتەريالدارىنىڭ ءوندىرىسى 5 پايىزعا ءوستى. قىزمەت كورسەتۋ سەكتورىندا ساۋدا - 11، كولىك سالاسى - 8 جانە بايلانىس - 7 پايىزدان استامعا ارتتى.

«بيىل 5 ايدىڭ قورىتىندىسىنا سايكەس اقمولا، الماتى، قىزىلوردا جانە شىعىس قازاقستان وبلىستارىندا، سونداي-اق شىمكەنت قالاسى مەن ەلوردادا بارلىق نەگىزگى كورسەتكىشتەر بويىنشا ءوسىم تىركەلىپ وتىر. جاۋاپتى مەملەكەتتىك ورگاندار مەن اكىمدىكتەر وسى جۇمىس قارقىنىن ساقتاۋى كەرەك. ول ءۇشىن ەكونوميكانى ءارتاراپتاندىرۋ، ينۆەستيتسيالار تارتۋ جانە جاڭا تۇراقتى جۇمىس ورىندارىن قۇرۋدى جالعاستىرۋ قاجەت»، - دەدى ءاليحان سمايىلوۆ.

سونداي-اق، ۇكىمەت باسشىسى مامىر ايىنىڭ قورىتىندىسىندا ەلدەگى جىلدىق ينفلياتسيا 14 پايىزدى قۇراعانىنا نازار اۋدارتتى.

«ونىڭ ىشىندە ازىق- تۇلىك ينفلياتسياسىنىڭ دەڭگەيى 19 پايىزعا جەتتى. بۇعان ەڭ الدىمەن، ازىق- تۇلىك تاۋارلارىنا الەمدىك باعانىڭ ءوسۋى اسەر ەتىپ وتىر. مەملەكەتتىك ورگانداردىڭ ءبىرىنشى باسشىلارى مەن اكىمدەر ينفلياتسيانى تەجەۋ جۇمىسىن كۇشەيتىپ، پارمەندى ءىس- شارالار قابىلداۋى ءتيىس»، - دەدى پرەمەر- مينيستر.