زەلەنسكي: رەسەيدىڭ ۋكرايناداعى شىعىنى ارتۋى مۇمكىن
سەبەبى ماسكەۋ جۋىردا دونباسسقا «دايىندىعى تومەن» رەزەرۆتەگى كۇشتەرىن جۇمىلدىرۋدى جوسپارلاپ جاتىر. ءبىراق رەسەي تاراپى ۋكراينادا قازا تاپقان ساربازدارىنىڭ سانىن ازايتىپ كورسەتىپ وتىر. ال ۋكراينا مايدان دالاسىندا 10 مىڭ جاۋىنگەرىن قالدىرعان. بۇل كەڭسە باسشىسى الەكسەي ارەستوۆيچتىڭ بەرگەن اقپاراتى.
ۆلاديمير زەلەنسكي، ۋكراينا پرەزيدەنتى:
- رەسەي دونباسسقا رەزەرۆتەگى كۇشتەرىن توكپەكشى. ولاردا قازىر قانداي رەزەرۆ بولۋى مۇمكىن؟ ياعني ۇرىسقا جاسىرىن موبيليزاتسيا ارقىلى جينالعان دايىندىعى ناشار جاۋىنگەرلەردى اتتاندىرماق. بۇل رەسەي گەنەرالدارىنىڭ ساربازداردىڭ ومىرىنە ەش ءمان بەرمەي، ادام سانى مەن تەحنيكا تۇرعىسىنان باسىمدىققا يە بولۋ ءۇشىن ارەكەت ەتىپ وتىرعانىن كورسەتەدى. مۇنىڭ سوڭى ۇلكەن شىعىنعا اكەلەدى.
دونباسستاعى احۋال قازىر دونباسستاعى سيەۆەرودونەتسك، باحمۋت، سلاۆيانسك جانە تاعى باسقا مەكەندەردە كەسكىلەسكەن شايقاس ءجۇرىپ جاتىر. سيەۆەرودونەتسك قالاسىنىڭ ۇشتەن ءبىر بولىگى ۋكراينا كۇشتەرىنىڭ باقىلاۋىندا. ءبىراق «ازوت» زاۋىتىندا 500-گە جۋىق بەيبىت تۇرعىن قالىپ قويعان. لۋگانسك وبلىسىنىڭ باسشىسى ولاردىڭ قالادان تەك جالعىز كوپىر ارقىلى شىعۋىنا مۇمكىندىگى بارىن ايتادى. بۇعان دەيىن رەسەي كۇشتەرى ءوندىرىس ورىنىن اتقىلاپ، اممياكتى وڭدەيتىن سەح جارىلدى.
www.24.kz
