قىمىز ىشۋدەن «جىل كولتاۋىسارى» انىقتالدى

نۇر- سۇلتان. قازاقپارات –قورعالجىن اۋدانىندا قىمىزمۇرىندىق تويى ءوتىپ، قىزدار مەن جىگىتتەر قىمىز ىشۋدەن جارىستى. تەك ۇلتتىق سۋسىن ەمەس، ۇلتتىق ويىنداردان دا سايىس ءوتتى.

- قىمىزمۇرىندىق - بيە ساۋىپ، العاشقى قىمىز ءىشۋ تويى. ءبىراق ءبىراز جەردە بۇل ۇمىت قالعان ەدى. قازىر سول سالتىمىز قايتا جاڭعىرىپ جاتىر. مىنە قورعالجىن وڭىرىندە وتكەن قىمىزمۇرىندىققا كۋا بولدىق. اۋدان جۇرتى بىرىگىپ، ءدۇبىرلى توي وتكىزدى.

بەرىك جانبايەۆ، قورعالجىن اۋدانىنىڭ اكىمى:

- بۇل حالىقتىڭ باستاماسى بولدى. ءبىز ونى قولدادىق. حالىق ارينە ساعىنعان. بارلىق شىعىندى دا، تەگىس وسى حالىق كوتەرىپ وتىر. قورعالجىن ازاماتتارىنىڭ ءوزىنىڭ تىرشىلىگىنىڭ ارقاسىندا ءبىز 25-تەن استام كيىز قۇردىق.

قىمىزمۇرىندىق تويىندا قىمىز ىشۋدەن جارىس ءوتتى. اۋەلى قىزدار سايىسقا ءتۇستى. كەيىن شارشى توپتىڭ الدىنا جىگىتتەر شىقتى. قاتىسقان ازاماتتار 6 توستاعاننان اسا الماعان ەدى. كەڭبيدايىقتىڭ ازاماتى دۋلات 8-توستاعاننان توقتادى. دۋلاتتىڭ جەرلەسى ەسەنگەلدى مۇسابەكوۆ ەسىمدى ازامات 5 مينۋتتىڭ ىشىندە 10 توستاعاندى ءسىمىرىپ، «جىل كولتاۋىسارى» اتاندى.

ۇلتتىق بولمىسىمىز كورىنىس تاپقان تويدا ۇلتتىق ويىنداردان دا جارىس ءوتتى. شاباندوزدار بايگەگە ءتۇسىپ، پالۋاندار بەلدەسىپ، كوكپار تارتتى.

مۇراگەر احمەتبەكوۆ، شالقار اۋىلىنىڭ تۇرعىنى:

- كوكپاردا 80-90 ات قاتىستى. اقمولا وبلىسىنىڭ تۇكپىر- تۇكپىرىنەن پالۋاندار وسى كوكپارعا قاتىستى. بايگەمىز ءوتتى. الامان بايگە 25 شاقىرىمعا. 30-40 ات بايگەگە قاتىستى. تاي جارىس بولدى. تاي جارىسقا وكرۋگ بويىنشا 25-30 شاقتى ات قاتىستى. كۇرەستەن بالالار اراسىندا ەڭ كىشى سالماقتان باستاپ، تۇيە پالۋانعا دەيىن ءارتۇرلى سالماقتا ءوتتى. توي وتكەن جەر «بىتىعاي» دەپ اتالادى. ۇلتتىق تويدىڭ بۇل ماڭدا ۇيىمداستىرىلۋى بەكەر ەمەس. قورعالجىن اۋىلىنىڭ ىرگەسىندە جاتقان «بىتىعاي» كەزىندە كونە قالاشىق بولعان.

تويدىڭ شاشباۋىن كوتەرىپ ەلوردادان قورعالجىنعا ەركەعالي راحمادييەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترى دە باردى. ونەرپازدار قىمىزمۇرىندىقتى قىزدىرىپ، جۇرتتى ءان، كۇيمەن تەربەدى.

www.24.kz