ەلورداداعى جاڭا مەشىتتىڭ الدى ۇلكەن ساياباققا اينالادى - اكىم

نۇر- سۇلتان. قازاقپارات - نۇر- سۇلتان قااسىنداعى جاڭا مەشىتتىڭ كىرەبەرىس اللەياسىنىڭ الدىندا قوعامدىق كەڭىستىك اشىلادى، دەپ حابارلايدى قازاقپارات ەلوردا اكىمى التاي كولگىنوۆتىڭ الەۋمەتتىك جەلىدەگى پاراقشاسىنا سىلتەمە جاساپ.

ونىڭ جازۋىنشا، قازىر بۇل جەردە ابباتتاندىرۋ جۇمىسى ءجۇرىپ جاتىر. بۇل قوعامدىق كەڭىستىك قالا تۇرعىندارى مەن قوناقتارى ءۇشىن ۋاقىتتى ءتيىمدى وتكىزۋگە بولاتىن تارتىمدى ورىنداردىڭ بىرىنە اينالادى. قوعامدىق كەڭىستىك ماڭگىلىك ەل، قابانباي باتىر داڭعىلدارى جانە ساۋران، حۋسەين بەن تالال كوشەلەرىنىڭ بويىندا ورنالاسقان.

«ورتالىق اللەيادا ۇزىندىعى 300 مەتر بولاتىن سۋبۇرقاق ورنالاسقان، سول سياقتى كولەڭكەلى شاتىرلار، شاعىن ساۋلەت نىساندارى ورناتىلادى ءارى ماڭايى اۋقىمدى تۇردە كوگالداندىرىلادى. جاياۋ سەرۋەندەۋ، دەمالىستى تىنىش ورىندا وتكىزۋ جاعدايى، كولىك تۇراقتارى جانە ت. ب. ورىندار قاراستىرىلعان. جىل سايىن اۋماقتى قوسىمشا كوگالداندىرىپ، قوعامدىق كەڭىستىكتى جاقسارتاتىن بولامىز. ول كەزەڭ- كەزەڭىمەن اباتتاندىرىلعان ۇلكەن ساياباققا اينالادى»، دەپ جازدى شەنەۋنىك.

مەشىتتىڭ وزىنە كەلەتىن بولساق، ول ەلىمىزدەگى جانە ورتالىق ازياداعى ەڭ ۇلكەن مەشىت بولىپ ەسەپتەلەدى. نەگىزگى كۇمبەزىنىڭ بيىكتىگى - 90 مەتر، مۇنارالارى - 130 مەتر. مەشىتتىڭ سىيىمدىلىعى 30 مىڭ ادامعا ارنالعان. مەشىتتىڭ قۇرىلىسى دەمەۋشىلىك قاراجات ەسەبىنەن جۇرگىزىلىپ جاتىر.