پەتروپاۆلدا «ماعجان. جارالى جولبارىس» تەلەحيكاياسىنىڭ ءتۇسىرىلىمى باستالدى
پەتروپاۆلدا بۇگىن «ماعجان. جارالى جولبارىس» تاريحي تەلەحيكاياسىنىڭ ءتۇسىرىلىمى باستالدى. كينوكومپانيا ماماندارى قىزىلجار وڭىرىندە شامامەن ءبىر اي جۇمىس ىستەمەك.
«الاشتىڭ ارىسى ءاليحان بوكەيحانوۆتىڭ سوزىنشە، ماعجانداي اقىنى بار ەلدىڭ ءتىلى جۇتاڭ، مادەنيەتى تومەن بولۋى مۇمكىن ەمەس. ماعجان قازاق اقىندارىنىڭ ىشىندەگى شوقتىعى بيىگى. كەي اقىندار ماعجاندى ولەڭنىڭ پايعامبارىنا تەڭەگەن. اباي اقىلدىڭ اقىنى، ماعجان اقىننىڭ اقىنى دەپ ايتامىز. سوندىقتان بۇل ءىستى باستاردا ۇلكەن دايىندىقتان وتتىك. وسى قىزىلجار وڭىرىنە ارنايى كەلىپ، ماعجاننىڭ تۋعان جەرى، اۋىلى سارتوماردا بولدىق. وسى ولكەنىڭ گەوگرافيالىق ەرەكشەلىكتەرىنە دە ءمان بەردىك. سەبەبى ستسەناريي جازۋ بارىسىندا سەن كەيىپكەرلەرىڭنىڭ قاي جەردە جۇرەتىنىن ءبىلۋ كەرەكسىڭ. ودان كەيىن ماعجان تانۋشى بەلگىلى عالىمدار ەربول تىلەشوۆ، ديحان قامزابەك ۇلى اعالارىمىزدان، كەيىنگى جاس تولقىن بار، سول كىسىلەرمەن سويلەسىپ، ماعجاندى جازعان زيالىلاردىڭ كىتاپتارىن وقىدىق»، - دەيدى جوبا اۆتورى، سسەناريىن جازعان قانات رامازان. سسەناريدى جازۋعا ەكى اي ۋاقىت كەتكەن.
«ماعجاننىڭ ءومىرىنىڭ قاي كەزەڭى قامتىلماق؟ ماعجاننىڭ جاستىق شاعى، 1915-21 -جىلداردىڭ ارالىعى، 20-27 جاس اراسىنداعى بوزبالالىقتان اقىندىققا ترانسفورماتسيا جاساعانىن، اقىندىقتان قايراتكەرلىككە بەت بۇرعان ماعجاننىڭ بولمىس- ءبىتىمىن كورسەتەمىز دەپ حرونولوگيالىق مەرزىمگە توقتادىق. ياعني البىرت، بوزبالا، مىنەزدى، سالماقتى، 20 جاسىنىڭ وزىندە قازاق ۇلتىنا سالماقتى ىستەر جاساپ جۇرگەن، وسى جاستىڭ وزىندە ارتىنا مول مۇرا قالدىرا بىلگەن ماعجاندى قازىرگى جاستارعا كورسەتۋ. سەبەبى قازىرگى اۋديتوريامىز - جاستار. ماقساتىمىز جاستارعا وي سالۋ. 20 جاسىندا نە ىستەدى الاشتىڭ ارىستارى، قازىرگى بالالار كۇندەلىكتى وقۋىنا، ساباعىنا بارىپ كەلگەنىنە ريزا بولىپ جۇرگەن زامان عوي بىلايشا ايتقاندا. ولار 20-21 جاسىندا تۇتاس ۇلتتىڭ مۇددەسىن، بولاشاعىن يىققا ارتىپ العانداي كۇيدە ءجۇردى. وسىنى ادەمى كورسەتسەك دەيمىز. بۇدان باسقا ماعجاننىڭ ليريكاسى، اقىننىڭ مۋزاسى گۇلسىمگە كوبىرەك نازار اۋداردىق. اركىم ءارتۇرلى ايتار كەيىن، ءبىراق وسى ۇتىمدى شىعادى دەپ ولاپ وتىرمىز»، - دەيدى قانات رامازان.
كوركەم فيلم 4 بولىمنەن قۇرالادى. ءارقايسىسى 50 مينۋتتان تۇرماق. باستى ءرولدى اكتەر مەيىرحات امانگەلدين سومدايدى.
«جالپى ء
فيلمدى تۇسىرۋگە دايىندالعانىمىزعا جارتى جىل بولدى. وسى تاقىرىپتى جان- جاقتى زەرتتەپ، ماعجان تانۋشىلارمەن كەلىسىلىپ جازىلعان سسەناري بويىنشا ءتۇسىرىلىمدى باستادىق. مۇندا ءمىرجاقىپ، ساكەن سەيفۋللين سياقتى ءىرى تۇلعالار بوي كورسەتەدى. گۇلسىم دەگەن عاشىعى ارقىلى ليريكالىق ماحاببات جەلىسى دە ءوربيدى. ماعجاننىڭ تۋعان اۋىلى سارتومارعا بارامىز، ساسىقكول ماڭىندا ءبىراز تۇسىرىلىمدەر بولادى. 20-25 كۇن ءتۇسىرىلىم جاساۋدى جوسپارلادىق. كەي ەپيزودتار پەتروپاۆلدا، قالا ماڭىندا تۇسىرىلەدى»، - دەيدى فيلم رەجيسسەرى دارحان ساركەنوۆ.
اۆتور: اقەركە داۋرەنبەك قىزى
