بالىقتار تۋرالى قىزىقتى دەرەكتەر

نۇر- سۇلتان. قازاقپارات - تابيعاتتاعى ءار جاراتىلىستىڭ وزىنە ءتان ەرەكشەلىگى، ەشكىمگە ۇقساماس دارالىعى بار.

بالىقتار وسىدان 450 ميلليون جىل بۇرىن، ءتىپتى دينوزاۆرلاردان بۇرىن پايدا بولعان دەلىنەدى. عالىمداردىڭ ايتۋى بويىنشا الەمدە 250 مىڭعا جۋىق بالىق بار. ونىڭ 15 مىڭعا تاياۋى ءالى زەرتتەلمەگەن. سۇتقورەكتىلەردىڭ، باۋىرىمەن جورعالاۋشىلاردىڭ، سۋدا دا، قۇرلىقتا دا تىرشىلىك ەتەتىن قوسمەكەندىلەردىڭ سانىن قوسساڭىز بالىقتاردىڭ سانىنا جەتپەيدى ەكەن.

الەمدەگى ەڭ ۇلكەن بالىق - كيت اكۋلاسى. ونىڭ ۇزىندىعى 20 مەتر، سالماعى 34 تونناعا تەڭ. بارلىق اكۋلا سەكىلدى اكۋلانىڭ قاڭقاسى تۇتاستاي شەمىرشەكتەن تۇرادى. الىپ اكۋلانىڭ 4 مىعا جۋىق ءتىسى بولادى. بالىقتار دا ادامدار سەكىلدى، قۇستار سەكىلدى اۋرۋدى سەزىنە الادى.

ەڭ جىلدام بالىق - قىلىش- بالىق. ونىڭ جىلدامدىعى - ساعاتىنا 130-140 ك م.

تەڭىز اتبالىقتارى باسقا بالىقتاردان كولدەنەڭ جۇزەتىندىگىمەن ەرەكشەلەنەدى. ولار وتە جاي جۇزەدى. شامامەن ەسەپتەگەندە 1 ساعاتتا 1,5 مەترگە عانا جىلجيدى ەكەن. قورقىنىشتى ءارى تۇڭعيىق تەرەڭدە جۇزەتىن بالىقتار ەشقاشان جارىقتى كورمەيدى. ولار الەمدەگى ەڭ تەرەڭ ماريانا شۇڭعىماسىندا تىرشىلىك ەتەدى.

جاپونيادا فۋگۋ بالىعى ەرەكشە، الايدا وتە قاۋىپتى تاعام بوپ ەسەپتەلەدى. ول ءولىم تۋدىراتىن تەترودوكسين ۋىن بولەدى. سوعان قاراماستان فۋگۋ وتە ءدامدى تاعام. بالىقتىڭ دامدىلىگى سونشا، ونى جاپون اسپازدارى تاۋەكەلگە بەل بۋىپ، دايىندايدى.
جاپون اسپازى مۇنداي تاعامدى دايىنداۋ ءۇشىن ۋلى بالىقتاردان تاعام دايىنداۋ مەكتەبىنەن ساباق الىپ، ارنايى سەرتيفيكات يەلەنۋى قاجەت.

سۋدىڭ لاستانۋىنان بالىقتار جىنىسىن اۋىستىرۋى مۇمكىن. ماسەلەن، جەرگىلىكتى بريتاندىق سۋدا جۇزەتىن بالىقتار سۋعا كارىز جۇيەسىنىڭ توگىلۋىنەن جىنىسىن اۋىستىرعان.

Massaget.kz