قوجا احمەت ياسساۋي كەسەنەسىنە قاۋىپ ءتونىپ تۇر ما؟

نۇر- سۇلتان. قازاقپارات - تۇركىستانداعى قوجا احمەت ياسساۋي كەسەنەسىنە قاۋىپ ءتونىپ تۇر ما؟ ەل اراسىندا «تاريحي كەشەن ماڭىن جاساندى اباتتاندىرۋدىڭ سالدارىنان كەسەنە قابىرعالارى ىلعال تارتىپ، كۇمبەزدىڭ بەتكى قاباتى قوپسي باستاعان» دەگەن پىكىرلەر ايتىلىپ قالادى.

بۇل قانشالىقتى شىندىققا جاناسادى؟ ماماندار نە دەيدى؟ كەسەنە تۋرالى ءتۇرلى الىپقاشپا اڭگىمە بۇرىننان بار. الايدا ماماندار سوڭعى 10 جىل كولەمىندە قابىرعالارى تۇزدانىپ، توبەسىندە دىمقىل داقتار پايدا بولعانىن ايتادى. ونىڭ ناقتى سەبەبىن ءالى ەشكىم تولىق زەرتتەپ كورمەگەن. سوندىقتان عالىمدار تاريحي ەسكەرتكىشتى ساقتاپ قالۋ ءۇشىن شۇعىل شارا قولدانىپ، عىلىمي تۇردە زەردەلەۋ جۇمىستارىن جۇرگىزۋ قاجەت دەيدى.

ماۋلەن سادىقبەك، «ازىرەت سۇلتان» قورىق مۇراجايىنىڭ ديرەكتورى:

- عالىمدار سول باقىلاۋدىڭ ناتيجەسىندە قورىتىندى شىعارىپ عانا ءبىز مىنا پروبلەمالاردىڭ بارىنەن قۇتىلا الامىز. ال وعان دەيىن عىلىمي نەگىزدەگى اۋقىمدى جۇمىس اتقارىلماسا، ءبىز ءسوز دەڭگەيىنەن اسپايمىز. بىرەۋلەر ونى اباتتاندىرۋ جۇمىستارىنان كورەدى. تاعى باسقا سەبەپتەردى ايتادى. بىرەۋلەر ونى تەرىس دەيدى. بىزگە وسى داۋدىڭ نۇكتەسىن قويۋ ءۇشىن ارنايى ماماندانعان كاسىبي ماماندار وسى ماسەلەمەن تۇبەگەيلى اينالىسۋى كەرەك.

كەسەنە سالىنعالى بەرى قانشاما الاساپىران زامانداردى باستان وتكەردى. «وعان تابيعاتتىڭ توسىن مىنەزى - جاڭبىر مەن جەلدى قوسىڭىز. مۇمكىن ىرگەتاسى وتىرىپ، قابىرعالارى قيسايعان شىعار. سونىڭ بارلىعى تولىق زەرتتەۋدى قاجەت ەتەدى»، - دەيدى ماماندار. سوندا عانا ىلعالدىڭ قايدان كەلگەنىن بىلۋگە بولاتىنىن ايتادى.

ماۋلەن سادىقبەك، «ازىرەت سۇلتان» قورىق مۇراجايىنىڭ ديرەكتورى:

- ىلعالدانا بەرسە، ىلعال باسىم بولعان سايىن ول كىرپىشتى جەپ قويادى. كىرپىش مۇجىلگەننەن كەيىن ول قابىرعا قۇلاۋعا اينالادى. تۇزى بارلىعىن ىدىراتادى. قۇرىلىمىن بۇزادى. ساۋ تۇرعان دۇنيەنى ىدىراتىپ جىبەرەدى. سوندىقتان ول ءمۇجىلۋ، قۇلاۋ قاۋپى بار. ەگەر ءبىز بۇعان ءمان بەرىپ، امالىن قولدانباساق، تۇبىندە بۇل ۇلكەن قاۋىپ.

مۇراجاي باسشىسىنىڭ ايتۋىنشا، مادەنيەت جانە سپورت مينيسترلىگى بۇل ماسەلەدەن حاباردار. قازىردىڭ وزىندە ءبىرقاتار عىلىمي جۇمىس قولعا الىنعان. ال اي سوڭىندا كەسەنەنى تۇبەگەيلى تەكسەرۋ ءۇشىن تۇركىستانعا شەتەلدىك مامانداردى شاقىرۋ جوسپارلانىپ وتىر. وسى ۋاقىتقا دەيىن ورتاعاسىرلىق ساۋلەت ونەرىنىڭ جاۋھارى سانالاتىن قوجا احمەت ياسساۋي كەسەنەسىن كورۋگە كەلەتىن تۋريستەردىڭ سانى ارتپاسا كەمىگەن ەمەس.

تۇركىستان وبلىسىنا ساياحاتتاپ كەلگەندەردىڭ بارلىعى مىندەتتى تۇردە تۇركىستانعا سوعىپ، قوجا احمەت ياسساۋي كەسەنەسىنە زيارات جاساماي كەتپەيدى. وتكەن جىلى وڭىرگە 1 ميلليونعا جۋىق مەيمان كەلسە، بيىل 1,5 ميلليون ساياحاتشى كەلەدى دەپ كۇتىلۋدە. سوندىقتان دالا ساۋلەت ونەرىنىڭ جاۋھار تۋىندىسى قاشاندا جۇرتتىڭ نازارىندا. ال ونى تىڭعىلىقتى زەرتتەپ، زەردەلەۋ كەزەك كۇتتىرمەيتىن ماسەلە.

www.24.kz