ماس جۇرگىزۋشىنى توقتاتپاق بولىپ جاراقات العان پوليتسەيگە وردەن تابىستالدى
«جاساعان ەرلىگىڭ ءۇشىن II دارەجەلى «ايبىن» وردەنىمەن ناگرادتالدىڭ. سول ناگراداڭدى ءمينيستردىڭ تاپسىرماسىمەن ءوزىڭنىڭ كوكىرەگىڭە ىلۋگە كەلىپ وتىرمىن، ارحات باتىر»، - دەدى ۆيتسە- مينيستر.
ەسكە سالساق، نۇر- سۇلتان قالاسى پ د مامانداندىرىلعان پاترۋلدىك پوليتسيا باتالونىنىڭ قىزمەت اعا ينسپەكتورى وتكەن جىلدىڭ جەلتوقسان ايىندا اسقان ەرلىك كورسەتىپ، جول قاۋىپسىزدىگىن ساقتاپ قالعان بولاتىن. ول ەلوردانىڭ قوشقاربايەۆ كوشەسىندە ەرەجەنى ورەسكەل بۇزىپ، اپاتتى جاعداي تۋدىرىپ كەلە جاتقان جۇك كولىگىن بايقايدى. ەر ادام ءتارتىپ ساقشىسىنىڭ تالاپتارىنا باعىنباي، قوزعالىسىن جالعاستىرماق بولادى. قايعىلى جاعدايدىڭ الدىن الماق بولعان ارحات سول ساتتە اۋىر جاراقات الادى. پوليتسيا كاپيتانىنا ەكى رەت وتا جاسالعان. كومادا بولعان جىگىت بۇگىندە ەسىن جيعان.
«مەكتەپتى «التىن بەلگىگە» ءبىتىردى. ودان كەيىن ەۋرازيا ۇلتتىق ۋنيۆەرسيتەتىنە ءتۇستى. سول ۋنيۆەرسيتەتتى دە جاقسى ءتامامدادى. ودان كەيىن اكادەمياسىن وقىدى. ءوزىنىڭ ارمانى بولاتىن. جۇمىسقا ورنالاستى. ەندى سول ارمانىنا جەتتى دەپ وتىر ەدىك… پوليتسيا جۇمىسى - وتە اۋىر جۇمىس. ەلدىڭ اماندىعىن ويلايتىن جۇمىس قوي. بارلىعى بالاڭىز ەرلىك جاسادى دەپ جازىپ جاتىر. بالامنىڭ ەرلىك جاساعانىنا قۋانامىن. ەل ازاماتى بولعانىنا قۋانامىن»، - دەدى ارحاتتىڭ اناسى الما راكيشيەۆا.
ارىپتەستەرى دە ارحاتتى ءاردايىم قولداپ، كومەكتەرىن اياماۋدا. ونىڭ الداعى ەمىن دە ۆەدومستۆو تولىق قامتيتىن بولادى.
«اۋرۋحانادا دا مەن ءوزىم جانىندا بولدىم. كوردىم قانداي بولعانىن. دەپارتامەنتتىڭ اۋرۋحاناسىنا دا كوپ راقمەت. قولدارىنان كەلگەنىن جاسادى. 24 ساعات بويى مەن بايلانىستامىن. قانداي كومەك بولسا دا قول ۇشىن بەرۋگە دايىنبىز»، - دەدى نۇر- سۇلتان قالاسى پ د مامانداندىرىلعان پاترۋلدىك پوليتسيا باتالونىنىڭ ۆزۆود كومانديرى نۇربەك كاگيبايەۆ. ماس كۇيدە كولىك تىزگىندەگەن جۇرگىزۋشى 8 جىلعا باس بوستاندىعىنان ايىرىلدى.
