قىتايلىق ايگىلى اكتەر جەكي چان اعىلشىن ءتىلىن قالاي ۇيرەندى؟

نۇر-سۇلتان.قازاقپارات - اعىلشىن ءتىلىن ۇيرەنۋ ءۇشىن شاكيرا مەن شۆارتسەنەگگەردىڭ قانداي ءتاسىل قولدانعانىن جازعان ەدىك. بۇگىن قىتايلىق ايگىلى اكتەر جەكي چان تاجىريبەسىن نازارلارىڭىزعا ۇسىنباقپىز.

China Daily باسىلىمىنا سۇحبات بەرگەن دجەكي چان اعىلشىن ءتىلىن قالاي ۇيرەنگەنىن ايتىپ بەرگەن. ول بۇل سۇحباتتا ءتىل ۇيرەنۋدە قانداي قيىندىقپەن كۇرەسكەنىن، قانداي ءتاسىل قولدانعانىن باياندايدى. ونىڭ ايتۋىنشا، گولليۆۋدقا العاش كەلگەندە قيىندىق تۋدىرعان ونىڭ اعىلشىن ءتىلىن بىلمەۋى ەدى. ول كەز كەلگەن قيىن تريۋكتى وڭاي ۇيرەنىپ الاتىن، فيلمگە ءتۇسۋ كەزىندە مىندەتتى تۇردە باستى رولگە شاقىرىلاتىن، ءبىراق اعىلشىن ءتىلىن مەڭگەرۋگە كەلگەندە وتە قاتتى قينالعانىن مويىندايدى.

اعىلشىن ءتىلىن ۇيرەنۋ جەكي چان ءۇشىن قورقىنىشتى ءىس ەدى. الەمگە تانىلىپ، ءوزىن مويىنداتۋ ءۇشىن اعىلشىن ءتىلىن ۇيرەنۋ مىندەتتى ەكەنىن تۇسىنگەننەن كەيىن، ول بەلدى بەكەم بۋىپ، اعىلشىنشا ءبىر ءسوز بىلمەستەن امەريكاعا اتتانادى. جەكي چان ءومىرىنىڭ وسى كەزەڭى «قاربالاس ءسات» فيلمىندە (دەتەكتيۆ دجەيمس كارتەرمەن كەزىگەتىن ساحنا) كورىنىس تاپقان.

اعىلشىن ءتىلدى ورتامەن ارالاستى

اعىلشىن ءتىلىن ۇيرەنۋ ءۇشىن اعىلشىن ءتىلدى ورتانى ىزدەپ كەلگەن جەكي ارنايى ءتىل كۋرستارىنا دا بارىپ، وقىتۋشى كومەگىمەن ءتىلدىڭ گرامماتيكاسىن ۇيرەنۋگە كىرىستى. سول كەزەڭدە اكتەر تاۋلىكتىڭ 9 ساعاتىن ءتىل ۇيرەنۋگە جۇمساعان ەكەن. ال ءتۇسىرىلىم كەزىندە مىندەتتى تۇردە اعىلشىنشا بىلەتىن ارىپتەستەرىمەن بايلانىس ورناتىپ، جەڭىل تاقىرىپتا اڭگىمە- دۇكەن جۇرگىزۋگە تىرىستى.

فيلم، سەريال قارادى

دجەكي اعىلشىن تىلىندەگى فيلمدەر مەن سەريالداردى قارادى. العاشىندا ەكراننىڭ استىڭعى بولىگىنە سۋبتيتر كومەگىمەن، كەيىن ونى الىپ تاستاپ كورۋگە كوشتى.

ءان تىڭدادى

قىتاي ازاماتى ءۇشىن اعىلشىن تىلىندە اكسەنسىز سويلەۋ - وتە قيىن شارۋا. جەكي اعىلشىننىڭ سوزدەرىن ساناسىنا قوندىرىپ، ءسوز بەن ءسوزدى، سويلەمدى بايلانىستىراتىن دەڭگەيگە جەتكەندە امەريكالىق اندەردى تىڭداپ، داۋىستاپ ايتۋدى قولعا الدى. ءانشىنىڭ ورىنداۋىنداعىداي دىبىس شىعارۋدى ماقسات ەتىپ، قۇلاققا ۇرىپ تۇرعان جاعىمسىز اكسەنتپەن وسى ءتاسىل ارقىلى كۇرەستى.

فيلم سەناريلەرىن جاتتادى

جەكي چان فيلمگە تۇسكەن كەزدە تەك ءوزىنىڭ سوزدەرىن عانا ەمەس، تولىق فيلمنىڭ سەناريىن جاتتاپ الادى ەكەن. وسى ءتاسىلدىڭ كومەگىنىڭ ارقاسىندا ءوزى تىلدىك قورىن دامىتىپ جاتسا، ءسوزىن ۇمىتقان اكتەرلەرگە سول مەزەتتە ءماتىندى جىلدام ەستەرىنە تۇسىرۋگە كومەك بەرەدى ەكەن. نازارلارىڭىزعا جەكي چاننىڭ 2016 -جىلى «وسكار» سىيلىعىن يەلەنگەن كەزدە سويلەگەن ءسوزىن ۇسىنامىز.

Massaget.kz