قازاقستاندا ءۇش-ۇشتەن اباي، ەسىل جانە جامبىل، ەكى-ەكىدەن الماتى مەن اقتوعاي اۋدانى بار - ستاتيستيكا

نۇر-سۇلتان. قازاقپارات - ەلىمىزدە ءۇش اباي، ءۇش ەسىل، ءۇش جامبىل جانە ەكى الماتى مەن ەكى اقتوعاي اۋدانى بار.

ق ر ستراتەگيالىق جوسپارلاۋ جانە رەفورمالار اگەنتتىگىنىڭ ۇلتتىق ستاتيستيكا بيۋروسى وسىنداي مالىمەت جاريالادى.

قازاقپارات وسى ەلدى مەكەندەر تۋرالى اقپاراتتى جيناقتاپ شىقتى.

ءۇش اباي اۋدانى

العاش قۇرىلعان اباي اۋدانى بۇگىننەن باستاپ اباي وبلىسى (بۇعان دەيىن شىعىس قازاقستان وبلىسى) قۇرامىندا.

بۇرىنعى سەمەي وبلىسىنىڭ باتىس بولىگىندە 1928-جىلى 3- قىركۇيەكتە قۇرىلعان. اۋماعى - 20 مىڭ گەكتار. ورتالىعى - قاراۋىل سەلوسى.

ەكىنشى اباي اۋدانى — قاراعاندى وبلىسىنىڭ ورتالىق بولىگىندەگى اكىمشىلىك ءبولىنىس. 1973-جىلى قۇرىلعان. العاشىندا «ميچۋرين اۋدانى» بولىپ، 1997-جىلدان اباي اۋدانى اتالادى. اۋماعى - 6,5 مىڭ گەكتار. ورتالىعى - اباي قالاسى.

ءۇشىنشى اباي اۋدانى شىمكەنت قالاسىنىڭ باتىس بولىگىندە ورنالاسقان. اۋماعى - 49 704 گەكتار. 1973-جىلى 10- ساۋىردە قۇرىلىپ، 1996-جىلى تاراتىلىپ، 2004-جىلى قايتا قۇرىلعان.

ءۇش ەسىل اۋدانى

ەسىل اۋدانى — سولتۇستىك قازاقستان وبلىسىنىڭ وڭتۇستىك-باتىس بولىگىندەگى اكىمشىلىك اۋدان. 1997-جىلدىڭ 17- ساۋىرىنە دەيىن لەنين، سودان كەيىن ماسكەۋ اۋدانى اتالىپ كەلدى. اۋماعى - 5,14 مىڭ گەكتار. ورتالىعى — ياۆلەنكا اۋىلى.

اقمولا وبلىسىنىڭ باتىسىندا دا ەسىل اۋدانى بار. 1936-جىلى قۇرىلعان. اۋماعى - 8,0 مىڭ گەكتار. ورتالىعى — ەسىل قالاسى.

ءۇشىنشى ەسىل اۋدانى ەلوردادا. 2008-جىلدىڭ 5- تامىزىندا قۇرىلدى. اۋماعى - 31,2 مىڭ گەكتار.

ءۇش جامبىل اۋدانى

جامبىل اۋدانى - الماتى وبلىسىنىڭ وڭتۇستىك-باتىسىندا ورنالاسقان اكىمشىلىك بىرلىك. 1928-جىلى قۇرىلعان. اۋماعى - 19,3 مىڭ گەكتار. ورتالىعى - ۇزىناعاش اۋىلى.

جامبىل وبلىسىنىڭ وڭتۇستىك-باتىسىنداعى اۋدان دا جامبىل دەپ اتالادى. 1928-جىلى قۇرىلعان. اۋماعى - 4,3 مىڭ گەكتار. ورتالىعى - اسا اۋىلى.

تاعى ءبىر جامبىل اۋدانى سولتۇستىك قازاقستان وبلىسىندا. 1997-جىلى بۇرىنعى پرەسنوۆ جانە جامبىل اۋداندارىنىڭ قوسىلۋىنان پايدا بولدى، بۇل رەتتە 1928-جىلعى شەكارا قالپىنا كەلتىرىلگەن. اۋماعى - 7,46 مىڭ گەكتار. ورتالىعى - پرەسنوۆكا اۋىلى.

ەكى الماتى اۋدانى

ەڭ الدىمەن، قازىرگى نۇر-سۇلتان، ول كەزدە استانا قالاسىنىڭ اۋماعىندا الماتى اۋدانى قۇرىلعان.

1998-جىلى 6- مامىردا. اۋماعى - 21054 گەكتار. ال، 2018-جىلى 30- ناۋرىزدا اقتوبە قالاسىنداعى اكىمشىلىك-اۋماقتاردىڭ ءبىرى الماتى اۋدانى اتاۋىنا يە بولدى.

ەكى اقتوعاي اۋدانى اقتوعاي اۋدانى - پاۆلودار وبلىسىنىڭ سولتۇستىك-باتىسىندا ورنالاسقان. جەر اۋىپ كەلگەن شارۋالاردىڭ تىڭ يگەرۋىمەن بايلانىستى 1907-جىلى ىرگەسى قالانعان. اۋماعى - 9,8 مىڭ گەكتار. ورتالىعى - اقتوعاي اۋىلى.

قاراعاندى وبلىسىنىڭ وڭتۇستىك-شىعىسىندا دا ەرتەدەن كەلە جاتقان اقتوعاي اۋدانى بار. 1931-جىلى، كەي دەرەكتەر بويىنشا 1928-جىلى قۇرىلعان. اۋماعى - 52,0 مىڭ گەكتار. ورتالىعى - اقتوعاي اۋىلى.

ايتا كەتسەك، قازاقستاندا رەسمي تۇردە ءۇش جاڭا وبلىس قۇرىلدى.